Skandal pa fund në futboll: Arrestime, baste dhe emra të mëdhenj

Një tjetër zhvillim i rëndë gjyqësor ka goditur futbollin turk, duke thelluar krizën që prej muajsh po trondit kampionatin. Me urdhër të Prokurorisë së Stambollit, është zhvilluar një operacion i gjerë kundër një rrjeti të dyshuar të basteve të paligjshme, që ka përfunduar me arrestimin e 29 personave.

Hetimet kanë zbuluar se mes të ndaluarve ndodhen edhe 14 futbollistë që aktualisht janë aktivë në kampionate të ndryshme. Sipas akuzave, ata dyshohet se kanë ndikuar në rezultate ndeshjesh, duke përfituar financiarisht përmes basteve të vendosura mbi ekipet kundërshtare. Autoritetet kanë siguruar prova që lidhen me lëvizje të dyshimta parash në llogaritë bankare të personave të përfshirë.

Operacioni ka shtrirë ndikimin edhe në nivele drejtuese të futbollit turk. Mes të arrestuarve figuron edhe Erden Timur, ish-zëvendëspresident i Galatasarayt, një emër i njohur në strukturat e klubit. Arrestimi i tij ka rritur ndjeshëm vëmendjen publike dhe mediatike, ndërsa nga klubi verdhekuq ende nuk ka një reagim zyrtar.

Të dhënat e deritanishme flasin për përmasa shqetësuese të skandalit. Rreth 1.500 persona janë përfshirë në dosje hetimore, ndërsa masat disiplinore kanë prekur qindra ndeshje dhe figura të futbollit, përfshirë afro 1.000 futbollistë dhe rreth 150 arbitra.

Ndërkohë, tensionet janë shtuar edhe më shumë pas një zhvillimi tjetër paralel. Sadettin Saran, presidenti aktual i Fenerbahçes, i zgjedhur në këtë post vetëm disa muaj më parë, është arrestuar në kuadër të një hetimi të veçantë. Sipas autoriteteve, kjo çështje nuk ka lidhje direkte me futbollin, por lidhet me një dosje të gjerë antidrogë në industrinë e argëtimit.

Ngjarjet e fundit kanë ngritur alarmin maksimal në futbollin turk, duke vënë në diskutim besueshmërinë e garave dhe duke paralajmëruar pasoja të rënda për të ardhmen e sportit në vend.

"KORCA BOOM"