Skënderbeu zhvillon ndeshje brenda grupit/ Spikatin titullarët dhe talentet në provë

Diten e djeshme, skuadra e Skënderbeut zhvilloi një ndeshje kontrolli brenda grupit, me qëllim evidentimin e formës fizike dhe teknike të futbollistëve pas fazës së parë të përgatitjeve.

Kjo ndeshje shërbeu jo vetëm për të parë nivelin e lojtarëve titullarë nga sezoni i kaluar, por mbi të gjitha për të vëzhguar nga afër futbollistët që pretendojnë të veshin fanellën bardhekuqe në sezonin e ardhshëm.

Ajo që të linte përshtypje pozitive ishte prania e madhe e futbollistëve të rinj korçarë, të cilët vijnë nga akademia e klubit dhe që janë aktualisht në provë. Përveç tyre, pjesë e takimit ishin edhe disa lojtarë të huaj, të ftuar nga stafi teknik për të testuar potencialin dhe përshtatshmërinë e tyre me filozofinë e skuadrës.

Titullarët tregojnë vazhdimësi forme

Ndër më të spikaturit në këtë ndeshje ishin lojtarët e formacionit të vitit të kaluar, të cilët treguan se janë rikthyer në stërvitje me përkushtim dhe në gjendje të mirë fizike. Franklin, Bismark, Alia, Randi, Zenullari dhe Janaqi dhanë sinjale shumë pozitive, duke konfirmuar se kanë qenë aktivë edhe gjatë periudhës tranzitore dhe janë gati për të udhëhequr ekipin në sezonin e ri.

Konkurrencë dhe potencial i ri në organikë

Ndeshja u shfrytëzua maksimalisht nga stafi për të testuar sa më shumë lojtarë dhe për të vlerësuar në mënyrë objektive mundësitë që ofron çdo individ. Talente nga akademia e Skënderbeut, së bashku me elementët e rinj të ardhur nga jashtë, dhanë një paraqitje inkurajuese, duke shtuar konkurrencën në çdo repart.

“KORÇA BOOM”