Skënderbeut i ndalohet merkatoja / Zbardhen tre vendimet e DhKZM që e penalizojnë klubin korçar

Klubi i Skënderbeut përballet me një situatë të vështirë në prag të sezonit të ri futbollistik, pasi i është ndaluar zyrtarisht afrimi i futbollistëve të rinj në merkato.

Ky është një zhvillim që vjen si pasojë e tre vendimeve të dhëna nga Dhoma Kombëtare e Zgjidhjes së Mosmarrëveshjeve (DhKZM), të cilat tashmë janë bërë të detyrueshme për zbatim.

Burime pranë FSHF-së bëjnë me dije se këto vendime janë marrë gjatë vitit 2023, konkretisht në muajt janar, korrik dhe gusht, dhe i referohen çështjeve të hapura që lidhen me mosshlyerjen e detyrimeve kontraktuale të klubit ndaj ish-lojtarëve ose palëve të treta.

Pavarësisht se për një periudhë të gjatë ky ndalim nuk ishte zbatuar realisht për shkak të proceseve të hapura, tashmë bllokimi është kthyer në fuqi. Skënderbeu nuk do të mund të regjistrojë asnjë lojtar të ri, për sa kohë nuk zgjidh çështjet ligjore dhe nuk respekton detyrimet financiare të përcaktuara nga vendimet e DhKZM-së.

Ndërkohë, mbetet për t’u parë nëse drejtuesit e Skënderbeut do të arrijnë të gjejnë një marrëveshje me palët e dëmtuara dhe të përmbushin detyrimet për të hequr ndalimin nga merkatoja.

Përndryshe, klubi rrezikon të hyjë në sezon me një skuadër të pakonkurrueshme dhe me opsione të kufizuara për përforcime.

“KORÇA BOOM”