SUPER Skënderbe/ Mposht Pogradecin në shtëpi, në derbin e juglindjes

POGRADECI -SKËBDERBEU 0-1

Shënues: Tajo 93'

POGRADECI: Staniç, Toshevski, Zguro, Samake, Pere, Kazim, Rodriguez, Makafui, Kim, Krasniqi, Danladi.

Trajner: Ardian Mema

SKËNDERBEU: Alia, Vaskuez, Dumfur, Vangjeli, Janaqi, Çuçka, Estrela, Shaqe, Abubakar, Nasr, Gjata.

Trajner: Ernest Gjoka

Gjyqtar: Kreshnik Cjapi

Skënderbeu e tregoi edhe një herë veten, tregoi se është skuadra pretendente për t'u ngjitur në Superligë.

Skënderbeu mban vendin e parë me 7 pikë pas 3 ndeshjesh të luajtura, ndërsa Pogradeci ka marrë 5 pikë në përballjet e deritanishme, ku duhet theksuar se është skuadra e vetme që nuk ka pësuar gol.

Kështu ka përfunduar edhe derbi i shumëpritur i juglindjes, me një fitore të bardhekuqve edhe pse në minutat shtesë të ndeshjes.

Minutat dhe rastet e pjesës së parë

1′ Nis dueli në Pogradec.

4’ Pogradecarët kërkojnë penallti për ndërhyrje të Dumfur ndaj Ezekiel, por kryesori Cjapi lë që loja të vazhdojë.

10’ Një gjuajtje me kokë drejt portës së Skënderbeut zgjidhet nga Dumfur me kokë mbi vijën fatale.

21’ Samake është futbollisti i parë që ndëshkohet me karton të verdhë pas një faulli ndaj Çuçkës.

27’ Rodriguez shfaqet në të majtën e sulmit të Pogradecit, gjuajtja e tij devijohet mbi portë nga Alia.

30’ Korçarët kërkojnë penallti për prekje të topit me dorë të Toshevskit, por gjyqtari lë lojën të vazhdojë dhe pastaj jep këndore, i sinjalizuar edhe nga VAR se më parë kishte devijim të topit me kokë.

34’ Ezekiel provon portën nga e djathta thuajse në fundore, por gjen Alian në pozicion.

39’ Nasr nxjerr Çuckën para portës, gjuajtja e tij ndalet nga portieri Staniç.

43’ Rodriguez kalon mes dy lojtarëve dhe provon të djathtën nga jashtë zonës, pa gjetur portën e Alias.

44’ Një goditje këndi sjell rrezik në portën e Pogradecit, pas një gjuajtje me kokë të Shaqes i cili çon sferën në duart e Staniç.

45’ Krasniqi shfaqet në anën tjetër me një gjuajtje diagonale duke mos gjetur portën.

Rastet dhe minutat e pjesës së dytë

46′ Nis pjesa e dytë pa zëvendësime në radhët e dy ekipeve.

52’ Nasr niset në kundërsulm me shpejtësi, shfaqet në zonë por gabon në gjuajtjen duke çuar sferën jashtë.

59’ Pasim perfekt për Tajo pak hapa larg portës, sulmuesi vonohet në rrotullimin e tij dhe sheh t’i heqin sferën nga këmbët.

60’ Nasr gjen Çuçkën në zonë, devijimi i këtij të fundit është i pasaktë.

66’ Provon edhe Ezekiel nga jashtë zonës, pa shumë sukses sepse nuk gjen portën e Alias.

69’ Janaqi lëshon një gjuajtje të fortë qendrore, të cilën Staniç e kontrollon në dy kohë.

79’ Skënderbeu shfaqet më kërkues duke rrezikuar me Nasr dhe Musa, por mungon shënjestra para portës.

81′ Pogradeci provon të surprizojë më një kundërsulm të shpejtë me Grecën, por është i vëmendshëm portieri Alia që del dhe kontrollon topin duke fituar duelin e shpejtësisë me sulmuesin e vendasve.

84′ Sërish rrezikshëm Pogradeci me Grecën që futet bukur nga e majta e zonës, provon me një gjuajtje diagonale, por topi devijohet ne fund nga Dumfur dhe shkon në këndore.

85′ Panik në zonën e Pogradecit pas një harkimi nga këndi, por Nasr nuk i gjen kohën topit për ta devijuar drejt rrjetës.

90’ Jepen 5 minuta shtesë.

90’+3’ GOOOL SKËNDERBEU! Një top nga thellësia gjen Tajo i cili gjuan me kokë dhe shënon golin e avantazhit.