Tre procedime penale në Korçë – dhunë fizike, vetëgjyqësi dhe vjedhje brenda familjes

Prokuroria pranë Gjykatës së Shkallës së Parë të Juridiksionit të Përgjithshëm Korçë ka regjistruar tre procedime penale ndaj tre shtetasve, të përfshirë në ngjarje të ndryshme me karakter penal.

Shtetasi V. B., 45 vjeç, banues në Korçë, po procedohet penalisht pasi dyshohet se ka goditur me grushte dhe shkelma një shtetas 65-vjeçar. Sipas informacioneve paraprake, ngjarja ka ndodhur për motive të dobëta, duke shkaktuar pasoja fizike te i moshuari.

Ndërkohë, V. V., 69 vjeç, gjithashtu banues në Korçë, është vënë nën hetim për veprën penale të vetëgjyqësisë. Ai dyshohet se i ka ndërruar në mënyrë të njëanshme bravën e derës së banesës së shtetasit E. B., duke pretenduar se prona i përket atij. Rasti është referuar në Prokurori për zbardhjen e plotë të situatës ligjore lidhur me pronësinë.

Ngjarja e tretë ka në qendër O. L., 41 vjeç, i cili po hetohet pasi dyshohet se ka vjedhur një shumë parash nga gjyshja e bashkëshortes së tij. Vjedhja dyshohet të ketë ndodhur në ambientet familjare dhe ka qenë vetë viktima që ka bërë kallëzimin.

Të tre rastet janë në hetim dhe Prokuroria, në bashkëpunim me strukturat e Policisë së Shtetit, po vijon procedurat për dokumentimin e plotë të rrethanave dhe përgjegjësive ligjore për secilin prej të dyshuarve.

“KORÇA BOOM”