Trump: Ngushtica e Hormuzit po hapet, por tensionet mbeten të larta

Presidenti i Shteteve të Bashkuara të Amerikës, Donald Trump, ka deklaruar se Ngushtica e Hormuzit po rikthehet gradualisht në funksion, duke shtuar se anijet kanë nisur të qarkullojnë sërish në këtë rrugë kyçe detare.

Në një intervistë për Fox Business, Trump nuk dha detaje të mëtejshme mbi situatën, por theksoi se zhvillimet janë në një fazë ende të paqartë.

Deklarata e tij vjen në një moment tensionesh të larta në rajon, pasi Iran ka paralajmëruar mundësinë e ndërmarrjes së sulmeve ndaj transportit detar në Gjirin Persik, Detin e Kuq dhe Gjirin e Omanit. Këto kërcënime janë bërë në përgjigje të bllokadës detare të vendosur nga Shtetet e Bashkuara të Amerikës ndaj porteve iraniane.

Sipas raportimeve ndërkombëtare, përfshirë BBC, bllokada amerikane ka hyrë në fuqi në fillim të javës. Ndërkohë, ushtria amerikane ka bërë të ditur se gjatë 24 orëve të para nuk është regjistruar asnjë anije që ka kaluar në zonën e prekur.

Intervista e Trump është realizuar përpara deklaratave më të fundit kërcënuese nga ana e Iranit, çka e bën situatën edhe më të ndërlikuar dhe dinamike.

Gjatë bisedës, Trump u shpreh se “nuk kemi përfunduar ende”, duke lënë të kuptohet se zhvillimet janë në vijim. Megjithatë, ai nuk përjashtoi mundësinë e një marrëveshjeje të madhe me Iranin, duke sugjeruar se konflikti mund të jetë pranë një zgjidhjeje.

Zhvillimet e fundit kanë rritur ndjeshëm shqetësimet për sigurinë e transportit ndërkombëtar detar, duke qenë se Ngushtica e Hormuzit konsiderohet një nga arteriet më të rëndësishme për furnizimin global me energji dhe tregtinë botërore.

“KORÇA BOOM”