Vetëm pak ditë pas betimit, Koçiu shkarkon zv.ministrin Mahila pas një denoncimi

Vetëm pak ditë pas marrjes së detyrës së re, Ministrja e Brendshme, Albana Koçiu, ka ndërmarrë një veprim të prerë dhe të menjëhershëm, duke propozuar shkarkimin e zv.ministrit të Brendshëm, Andi Mahila.

Sipas burimeve zyrtare, vendimi është marrë pas një denoncimi qytetar, i cili dokumentonte shkeljen e ligjit antiduhan nga ana e zëvendësministrit. Konkretisht, Mahila është kapur duke konsumuar duhan në një ambient të mbyllur, në kundërshtim me legjislacionin në fuqi që ndalon pirjen e duhanit në ambiente të brendshme publike apo institucionale.

Zv.ministri Mahila ka mbajtur këtë funksion për disa vite me radhë, por Ministrja Koçiu ka bërë të qartë se respektimi i ligjit do të jetë i pakompromis, pavarësisht funksionit apo pozicionit të individit.

Ky është vendimi i parë zyrtar i ministres së re të Brendshme, që pas betimit të saj në Presidencë, dhe sinjalizon një qasje të vendosur ndaj zbatimit të rregullave dhe përgjegjshmërisë institucionale.

Burime pranë ministrisë bëjnë me dije se nuk do të tolerohen shkelje të ngjashme nga askush në strukturat e Ministrisë së Brendshme apo institucionet vartëse.

“KORÇA BOOM”