ZBULOHET MOTIVI I VR*SJES NË NIKËL/ Eduart Afmataj dhe 41-vjeçari kishin dy vite që...

Ditën e djeshme, një ngjarje e rëndë u regjistrua në fshatin Vijon në zonën e Niklës, Fushë-Krujë, ku 41-vjeçari Artur Çangu, u vra me armë zjarri nga shtetasi Eduart Afmataj.

Sipas informacioneve, në kërkim vijon të jetë autori Eduart Afmataj.

Burime nga grupi hetimor bëjnë me dije se nga hetimet paraprake, ka rezultuar se viktima dhe autori kishin prej rreth dy vitesh konflikte të vazhdueshme për çështje pronësie.

Ngjarja ka precipituar mbrëmjen e së premtes, kur Çangu kishte shkuar në banesën e prindërve të tij dhe kishte parkuar automjetin pranë saj.

Ky veprim ka shkaktuar reagimin e menjëhershëm të Afmatajt, i cili ka dalë nga banesa dhe ka nisur një debat me 41-vjeçarin, duke pretenduar se makina i kishte bllokuar rrugën.

Debati mes tyre është përshkallëzuar në konflikt fizik, ku në një moment autori i dyshuar ka marrë një armë gjahu tip “çifte” dhe ka qëlluar për vdekje Çangun.

Pas krimit, Afmataj ka njoftuar vetë policinë dhe më pas është larguar nga vendngjarja, duke humbur gjurmët. Forcat e policisë kanë ushtruar kontrolle në zonë, por deri më tani nuk kanë arritur ta lokalizojnë dhe arrestojnë autorin e dyshuar.

Grupi hetimor po vijon punën për kapjen e tij dhe dokumentimin e plotë të rrethanave të ngjarjes.

“KORÇA BOOM”