Abuzim seksual dhe shpërdorim detyre: efektivi i policisë ndalohet nga AMP

Agjencia e Mbikëqyrjes Policore në rajonin Kukës–Dibër ka ndaluar një punonjës policie të DVP Dibër, i akuzuar për një rast të rëndë abuzimi seksual dhe shpërdorimi detyre.

Inspektori J. U., ndaj të cilit kishin nisur hetimet pas denoncimit të një qytetareje për përdhunim nën kërcënim, u arrestua në momentin e rikthimit në territorin shqiptar, pasi ishte larguar drejt Kosovës pas ngjarjes së datës 17 nëntor.

Përveç tij, në hetime janë përfshirë edhe dy persona të tjerë të dyshuar për ndihmë në fshehjen e ngjarjes apo presion për të mos kallëzuar.

Sipas njoftimit të AMP, punonjësi i policisë akuzohet për veprat penale “Marrëdhënie seksuale me dhunë me të rritura” dhe “Shpërdorim i detyrës”. Ndërkohë, shtetasja M. U. dyshohet për “Kanosja për të mos kallëzuar”, ndërsa shtetasi A. K. për “Përkrahje të autorit në krim”.

Pas përdorimit të metodave speciale të hetimit, u konstatua se inspektori ishte larguar në Kosovë, ndërsa arrestimi i tij u bë i mundur sot, në momentin e hyrjes në territorin e Shqipërisë.

"KORCA BOOM"