Avokati i Monika Kryemadhit në përplasje fizike në gjykatë. Shoqërohet nga Policia

Një incident është shënuar këtë paradite në ambientet e Gjykatës së Shkallës së Parë në Vlorë, ku një avokat ka ushtruar dhunë fizike ndaj një punonjësi sigurie.

Sipas burimeve nga vendngjarja, bëhet fjalë për avokatin Redi Llanaj, i njohur për përfaqësimin ligjor të disa figurave të njohura politike, përfshirë ish-kryetaren e Lëvizjes Socialiste për Integrim (LSI), Monika Kryemadhi.

Ngjarja ka ndodhur në zonën e kontrollit me detektorë metalesh, ku avokati dyshohet se ka refuzuar të kalojë sipas procedurave të sigurisë. Pas një debati verbal me punonjësin e rendit, situata ka agravuar në përplasje fizike.

Roja e sigurisë ka raportuar për dhunë të ushtruar nga avokati, ndërsa ky i fundit është shoqëruar menjëherë nga forcat e policisë në ambientet e komisariatit lokal për të dhënë deklarime mbi incidentin.

Autoritetet kanë nisur hetimet për të sqaruar rrethanat e ngjarjes dhe për të përcaktuar nëse do të ngrihen akuza penale ndaj avokatit Llanaj.

Ky incident ndodh në një kohë kur siguria në ambientet gjyqësore ka kaluar në fokusin kryesor të institucioneve dhe opinionit publik, pas një sërë ngjarjesh të rënda që kanë tronditur sistemin e drejtësisë në vend. Më 6 tetor, gjyqtari Astrit Kalaja u vra në sallën e gjyqit në Tiranë, ndërsa pak ditë më parë një tjetër incident u shënua me kërcënimin e një roje sigurie në Gjykatën e Apelit.

Ngjarje të tilla kanë rikthyer në vëmendje nevojën për forcimin e masave të sigurisë në gjykata dhe rishikimin e procedurave të hyrjes për personat që frekuentojnë ambientet gjyqësore, përfshirë edhe përfaqësuesit ligjorë.

“KORÇA BOOM”