Babë e bir qëllojnë me armë në ajër për të kanosur fqinjin, arrestohen në flagrancë

Një 56-vjeçar dhe djali i tij janë vënë në pranga pasi qëlluan me armë zjarri dhe armë gjahu në ajër, në fshatin Trush të Shkodrës, me qëllim kanosjen e fqinjit të tyre. Ndërkohë, djali tjetër i 56-vjeçarit është shpallur në kërkim.

Policia bën të ditur se në cilësinë e provës materiale janë sekuestruar 2 armë gjahu tip çifte, të cilat autorët i posedonin me leje.

Sipas njoftimit zyrtar, specialistët për Hetimin e Krimeve të Komisariatit të Policisë Shkodër, në bashkëpunim me Patrullën e Përgjithshme dhe Forcën e Posaçme “Shqiponja”, organizuan punën menjëherë pas marrjes së njoftimit për të sqaruar ngjarjen dhe për të kapur autorët.

"Si rezultat i veprimeve të shpejta, u kapën në flagrancë dhe u arrestuan shtetasit Ç. M., 56 vjeç, dhe D. M., 22 vjeç (babë e bir), banues në fshatin Trush. Gjithashtu, u shpall në kërkim shtetasi E. M., 27 vjeç", njofton policia.

Nga hetimet paraprake rezulton se tre shtetasit kanë qëlluar me armë në ajër pranë banesës së tyre për të kanosur fqinjin, shtetasin P. N., për shkak të një konflikti për motive të dobëta.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.

“KORÇA BOOM”