Boksi britanik në zi: Ricky Hatton humbet betejën më të rëndësishme, atë me jetën

Bota e sportit është tronditur nga lajmi se kampioni i botës në boks, Ricky Hatton, është ndarë nga jeta në moshën 46-vjeçare. I njohur me nofkën “The Hitman”, Hatton u gjet i vdekur në shtëpinë e tij në Manchester mëngjesin e së dielës, 14 shtator. Policia konfirmoi se vdekja nuk po trajtohet si e dyshimtë.

Lajmi ka shkaktuar reagime emocionale në rrjetet sociale dhe në komunitetin sportiv. Fansat kanë shkruar: “RIP Hitman”, duke e përshkruar si “një ikonë të boksit britanik dhe një nga karakteret më të dashura të sportit”. Edhe figura të njohura të mediave kanë reaguar, përfshirë Piers Morgan: “RIP Ricky ‘The Hitman’ Hatton, 46 vjeç. Një lajm jashtëzakonisht i trishtuar.”

Karriera e Hatton në boks zgjati nga 1997 deri në 2012, me 45 fitore dhe vetëm 2 humbje. Ai u përball me emra të njohur si Kostya Tszyu, Paulie Malignaggi, Floyd Mayweather Jr. dhe Manny Pacquiao. I lindur dhe rritur në Manchester, Hatton u bë një figurë e dashur për publikun, jo vetëm për sukseset në ring, por edhe për shpirtin e tij sportiv dhe jetën e sinqertë jashtë ringut.

Në kulmin e famës, Ricky hynte në ring me këngën “Blue Moon”, simbol i Manchester City-t, dhe kishte pranë yje si Noel dhe Liam Gallagher, David Beckham, Tom Jones, madje edhe Brad Pitt dhe Angelina Jolie, që e vizituan pas humbjes ndaj Mayweather në Las Vegas më 2007.

Pas tërheqjes nga boksi, Hatton u përball me depresion, alkoolizëm dhe abuzim me substanca, që e çuan deri në prag të vetëvrasjes. Ai pranoi publikisht betejat e tij me shëndetin mendor dhe u trajtua në klinikën The Priory në vitin 2010. Pavarësisht vështirësive, u rikthye në ring në vitin 2022 për një ndeshje ekspozuese me legjendën meksikane Marco Antonio Barrera.

Vetëm pak javë më parë, Hatton kishte shpallur rikthimin e tij në një tjetër ndeshje ekspozuese në Dubai, më 2 dhjetor, përballë boksierit Eisa Aldah. Ai kishte thënë me humor: “Do t’ju bëj krenarë sërish.” Fatkeqësisht, kjo sfidë nuk do të ndodhë kurrë.

Hatton ishte baba i tre fëmijëve dhe së fundmi kishte qenë në një lidhje me aktoren britanike Claire Sweeney. Djali i tij, Campbell Hatton, tashmë është boksier profesionist dhe vazhdon rrugën e të atit.

Ricky Hatton do të mbahet mend jo vetëm për triumfet në ring, por edhe për sinqeritetin e tij, dashurinë që mori nga tifozët dhe luftën për t’u rikthyer në jetë pas vështirësive.

“KORÇA BOOM”