Britania hedh idenë e bojkotit ndaj Botërorit në SHBA

Tensionet mes Shteteve të Bashkuara dhe aleatëve evropianë po reflektohen gjithnjë e më shumë edhe në arenën sportive. Në Britaninë e Madhe, një ligjvënës ka hedhur idenë e bojkotimit të Kupës së Botës 2026, që do të zhvillohet në SHBA, Kanada dhe Meksikë, si formë proteste ndaj politikave të presidentit amerikan Donald Trump.

Propozimi erdhi nga deputeti konservator Simon Hoare, i cili kritikoi hapur ambiciet e Trump për Grenlandën dhe presionin e ushtruar ndaj aleatëve tradicionalë. Sipas Hoare, qëndrimi i presidentit amerikan përbën mungesë respekti ndaj partnerëve transatlantikë dhe kërkon reagim politik, qoftë edhe simbolik.

Ligjvënësi britanik sugjeroi një sërë masash që, sipas tij, do ta “turpëronin” Trumpin në arenën ndërkombëtare. Mes tyre përfshihen anulimi i një vizite shtetërore të Mbretit Charles në SHBA, si dhe bojkotimi i Kupës së Botës, një ngjarje që presidenti amerikan e konsideron të rëndësishme për imazhin e tij global.

Ideja e bojkotit gjeti mbështetje edhe nga disa deputetë të tjerë, ndërsa analistët e politikës së jashtme e cilësojnë këtë qasje si një formë “rezistence të butë”, që synon të dërgojë sinjale politike pa përshkallëzuar konfliktin diplomatik.

Megjithatë, qeveria britanike u distancua shpejt nga këto deklarata, duke theksuar se sporti nuk duhet të përfshihet në përplasjet politike. Pavarësisht kësaj, debati ka nxjerrë në pah përçarjet gjithnjë e më të dukshme në marrëdhëniet transatlantike dhe ndikimin e politikës globale mbi evenimentet sportive ndërkombëtare.

"KORCA BOOM"