Dinamo në tronditje, sot vendimi që mund të ndryshojë gjithçka

Situata në kampin e Dinamos në volejboll për femra duket se po shkon drejt një pike kthese, pasi trajneri Orlando Koja është vënë seriozisht në pikëpyetje për vazhdimësinë e tij në krye të skuadrës. Prej javësh, brenda klubit ka qarkulluar ideja se marrëdhënia mes drejtuesve dhe trajnerit nuk është më në nivelin e duhur, ndërsa rezultatet në fushë kanë shtuar presionin për të marrë një vendim sa më shpejt.

Dinamovitët kanë investuar ndjeshëm këtë sezon, duke afruar lojtare cilësore dhe duke synuar një ekip konkurrues për objektiva të lartë. Por duket se paraqitjet deri tani nuk kanë përmbushur pritjet, gjë që i është faturuar trajnerit Koja, i cili ka qenë edhe personi që ka bërë përzgjedhjen e skuadrës. Pavarësisht shpenzimeve të konsiderueshme, performanca dhe rezultatet e ekipit nuk kanë reflektuar nivelin e investimeve.

Burime pranë klubit tregojnë se distanca mes palëve është shtuar gradualisht. Megjithëse asgjë nuk është bërë publike në mënyrë zyrtare, prej disa javësh flitet për një ftohje të dukshme në marrëdhënien trajner–drejtues, çka e ka bërë situatën të tensionuar. Në ambientet e klubit diskutohet se drejtuesit janë të pakënaqur me ecurinë e ekipit dhe me faktin që, sipas tyre, skuadra nuk ka ritmin, identitetin dhe qartësinë taktike që pritej me këtë përbërje lojtaresh.

Tashmë gjithçka duket se ka ardhur në një pikë vendimtare. Sipas të dhënave nga burime të brendshme, ditën e sotme pritet të mblidhen drejtuesit për të marrë një vendim final lidhur me të ardhmen e Orlando Kojës në pankinën e Dinamos. Nuk përjashtohet mundësia që klubi të zgjedhë një ndryshim të menjëhershëm për të rikthyer qetësinë dhe për të riorganizuar skuadrën në vijim të sezonit.

Për momentin, as trajneri dhe as klubi nuk kanë dhënë një deklaratë zyrtare, por zhvillimet e orëve të fundit pritet të jenë vendimtare për drejtimin e skuadrës blu në të ardhmen e afërt.

"KORCA BOOM"