Drejtoresha e DRAP Korçë, Vinjola Rota: Rihapja e Liceut Francez në Korçë, një hap i ri në bashkëpunim

Në faqen e vet zyrtare të facebook, DRAP Korçë dhe më konkretisht drejtoresha, Vinjola Rota ka bërë postim:

"Rihapja e Liceut Francez në Korçë, një hap i ri në bashkëpunimin.

Në Prefekturën e Korçës u mbajt sesioni përmbyllës i Komitetit Pilotues për projektin e rihapjes së Liceut Francez në Korçë, me pjesëmarrjen e Ministres së Arsimit znj. Mirela Kumbaro, Prefektit Nertil Jole dhe ekspertit të qeverisë franceze Jérôme Lebars.

Ky projekt, i mbështetur nga Ambasada e Francës dhe institucionet vendore e qëndrore, shënon një hap të rëndësishëm në forcimin e lidhjeve arsimore dhe kulturore mes Shqipërisë dhe Francës.

Ngritja e këtij institucioni do t’u ofrojë të rinjve mundësi të reja arsimore.

Gjatë takimit të djeshëm u diskutua mbi zhvillimin e gjuhës frënge në pesë shkollat mbështëse të seksionit dygjuhësh si shkollat 9 –vjeçare “Mësonjëtore e Parë Shqipe”, “Stavri Themeli”, “Sotir Gurra”, “Naum Veqilharxhi” dhe “Demokracia”, të Bashkisë Korçë, të cilat e kanë gjuhën frënge prioritet në programet e tyre arsimore

U theksua rëndësia e përmirësimit të cilësisë së mësimdhënies, trajnimit të mësuesve dhe organizimit të aktiviteteve që nxisin dashurinë për gjuhën dhe kulturën frënge.

Ministrja e Arsimit Mirela Kumbaro vlerësoi përkushtimin e shkollave dhe mësuesve që kontribuojnë çdo ditë në forcimin e mësimit të gjuhëve të huaja, duke e parë frëngjishten si një urë të rëndësishme drejt kulturës dhe bashkëpunimit evropian."

“KORÇA BOOM”