Dërgohen për gjykim Ilir Meta, Monika Kryemadhi dhe të tjerë: SPAK përfundon hetimet për korrupsion dhe pastrim parash

Prokuroria e Posaçme kundër Korrupsionit dhe Krimit të Organizuar (SPAK), më datë 29 gusht 2025, ka dërguar për gjykim në Gjykatën e Posaçme të Shkallës së Parë procedimin penal nr. 55/2019, në ngarkim të disa personave të pandehur, për një sërë veprash penale të rënda që përfshijnë korrupsion, pastrim parash dhe fshehje pasurie.

Të akuzuarit dhe veprat penale

Ilir MetaAkuzohet për kryerjen e veprave penale: korrupsion pasiv i funksionarëve të lartë ose të zgjedhur vendorë në tre raste (dy prej të cilave në bashkëpunim), pastrim i produkteve të veprës penale në bashkëpunim, si dhe fshehje, mosdeklarim apo deklarim të rremë të pasurisë dhe interesave private. Akuzat janë ngritur mbi bazën e neneve 260, 25, 287/2 dhe 257/a/2 të Kodit Penal.

Monika KryemadhiAkuzohet për korrupsion pasiv në dy raste të kryera në bashkëpunim, pastrim parash në bashkëpunim dhe deklarim të rremë apo fshehje të pasurisë, gjithashtu të parashikuara në të njëjtat nene të Kodit Penal.

Pirro XhixhoAkuzohet për korrupsion pasiv të funksionarëve të lartë, i kryer në bashkëpunim.

Ema ÇokuAkuzohet për pastrim të produkteve të veprës penale, e kryer në bashkëpunim.

Fatime KryemadhiAkuzohet për të njëjtën vepër penale si më sipër: pastrim parash në bashkëpunim.

Hetimi që zgjati mbi pesë vite

Ky procedim penal është rezultat i një hetimi të nisur në vitin 2019, i cili u zgjerua në vitet në vijim si pasojë e kallëzimeve të shumta. Gjatë vitit 2024, të gjitha procedimet e mëparshme u bashkuan në një dosje të vetme, çka çoi në thellimin e hetimeve dhe konsolidimin e provave.

SPAK ka dokumentuar një sërë episodësh që tregojnë përfshirjen e të pandehurve në skema korruptive, përfitim të parave nëpërmjet ndikimit politik dhe institucional, pastrim të parave të përfituara në mënyrë të paligjshme dhe fshehje të pasurive apo shpenzimeve në deklaratat zyrtare.

Bashkëpunim ndërkombëtar

Hetimet janë zhvilluar në bashkëpunim me autoritete ligjzbatuese të disa shteteve: Shtetet e Bashkuara të Amerikës, Austria, Italia, San Marino dhe Qipro. Ky bashkëpunim ka ndihmuar në identifikimin dhe verifikimin e transaksioneve financiare të dyshimta dhe veprimtarive që kanë shërbyer për pastrimin e produkteve të veprës penale.

“KORÇA BOOM”