E FUNDIT/ Ndahet nga jeta Llaqi Kostandini, ish-shoferi legjendar i Skënderbeut

Një figurë e dashur për sportin korçar është ndarë sot nga jeta. Llaqi Kostandini, ish-shoferi i klubit Skënderbeu, ka ndërruar jetë në moshën 90-vjeçare, duke lënë pas kujtime të paharruara në historinë e sportit të qytetit.

Të gjithë e mbajnë mend autobusin e vogël me mbishkrimin “Skënderbeu”, që për vite me radhë udhëtonte në të gjitha anët e vendit, duke shoqëruar me përkushtim dhe dashuri ekipet sportive të klubit, që nga futbolli e deri te lojërat me dorë.

Llaqi nuk ishte thjesht një drejtues mjeti – ai ishte një mik i ngushtë i sportistëve, një njeri që e donte sportin dhe që sakrifikonte pa zhurmë për ta bërë më të lehtë rrugëtimin e ekipeve. Në kohët kur infrastruktura rrugore ishte e vështirë dhe kushtet modeste, ai shpesh udhëtonte disa herë në ditë, duke shoqëruar një ekip në ndeshje dhe më pas duke u kthyer për të marrë një tjetër. Ishte aty, gjithmonë me buzëqeshjen dhe korrektësinë e tij.

Kontributi i Llaqit në sportin korçar ishte i jashtëzakonshëm – një emër që do të kujtohet gjithmonë me respekt dhe mall.

Ngushëllime familjes së tij dhe të gjithë komunitetit sportiv që sot humbi një mik të vërtetë.

“KORÇA BOOM”