Fund tragjik për njeriun më obez në botë, humb jetën në moshën 41-vjeçare

Juan Pedro Franco, 41 vjeç, i njohur si njeriu më obez në botë, ka ndërruar jetë në Meksikë, vetëm pak ditë para Krishtlindjeve. Ai ishte nën trajtim mjekësor në një spital në shtetin e Aguascalientes, ku gjendja e tij shëndetësore u përkeqësua me shpejtësi si pasojë e një infeksioni në veshka.

Vdekja u konfirmua nga mjeku kujdestar, José Antonio Castaneda, i cili bëri të ditur se Franco kishte shfaqur komplikacione serioze sistemike në ditët e fundit të jetës. Sipas mjekëve, organizmi i tij nuk arriti t’i përballonte pasojat e infeksionit, për shkak të problemeve të shumta shëndetësore që e kishin shoqëruar prej vitesh.

Në kulmin e obezitetit ekstrem, Juan Pedro Franco kishte arritur një peshë afër 600 kilogramëve, duke u bërë një rast unik në botë. Megjithatë, në vitet e fundit ai kishte bërë përpjekje të mëdha për të përmirësuar gjendjen e tij, duke arritur të humbiste rreth gjysmën e peshës trupore.

Historia e tij mori vëmendje ndërkombëtare në vitin 2017, kur Libri i Rekordeve Guinness e njohu zyrtarisht si personin më obez në botë. Në atë periudhë, Franco peshonte mbi 590 kilogramë dhe ishte kryesisht i shtrirë në shtrat, i paaftë të lëvizte në mënyrë të pavarur pas vitesh të tëra të obezitetit ekstrem.

Rasti i tij mbeti për shumë kohë një simbol i pasojave të rënda që obeziteti ekstrem mund të ketë mbi shëndetin dhe jetën e njeriut, por edhe i përpjekjeve të vështira për rikuperim në kushte tejet të ndërlikuara.

"KORCA BOOM"