Humb jetën ish-e dashura e Justin Bieber, modelja australiane u bë nënë vetëm para pak muajsh

Modelja australiane dhe sipërmarrësja e modës së plazhit, Sahara Ray, ka ndërruar jetë në moshën 34-vjeçare, vetëm disa muaj pasi solli në jetë vajzën e saj të parë. Lajmi i trishtë është konfirmuar nga familjarët e saj, ndërsa shkaku i vdekjes nuk është bërë ende publik.

Familja e modeles ka bërë të ditur për median amerikane TMZ se ajo ndërroi jetë në spital, e rrethuar nga njerëzit e saj më të dashur.

“Ajo ndërroi jetë mbrëmjen e kaluar, e rrethuar nga familjarët në spital. Ajo ishte shumë e dashur”, thuhet në deklaratën e familjes.

Humbja e saj vjen në një periudhë që duhej të ishte ndër më të bukurat e jetës, pasi në janar të këtij viti Sahara u bë nënë për herë të parë. Vajza e saj, Snow, ishte kthyer në qendrën e botës së saj, ndërsa modelja ndante herë pas here me ndjekësit momente nga jeta e tyre së bashku.

Madje, postimi i saj i fundit në Instagram, i publikuar më 19 korrik, i kushtohej pikërisht vogëlushes. Krahas fotografive të së bijës, ajo kishte shkruar: “Zemra ime e plotë, vogëlushja Snow”. Ky mesazh i ndjerë ka marrë vëmendje të veçantë pas lajmit për ndarjen e saj nga jeta.

Sahara Ray ishte e njohur jo vetëm për karrierën e saj si modele, por edhe si themeluese e markës së rrobave të banjës Sahara Ray Swim. Ajo tërhoqi vëmendjen e mediave ndërkombëtare në vitin 2016, kur u fotografua me këngëtarin kanadez Justin Bieber gjatë pushimeve në Hawaii. Dyshja u përfol për një lidhje romantike, megjithëse marrëdhënia e tyre nuk u konfirmua zyrtarisht. Në të kaluarën, emri i saj ishte lidhur nga mediat edhe me këngëtarin australian Cody Simpson.

Përtej famës dhe karrierës, jeta e modeles ishte përballur edhe me vështirësi të mëdha shëndetësore. Në vitin 2024, ajo foli publikisht për betejën me sindromën Guillain-Barré, një çrregullim i rrallë neurologjik që mund të shkaktojë dobësi të muskujve dhe paralizë.

Sipas raportimeve, gjendja e saj u shfaq pas një aksidenti të rëndë automobilistik dhe e la pjesërisht të paralizuar, duke e detyruar të përdorte karrige me rrota dhe ndihmë për të lëvizur. Megjithatë, deri më tani nuk është konfirmuar nëse kjo sëmundje ka pasur lidhje me vdekjen e saj.

Sahara ishte vajza e Tony Ray, një prej emrave të njohur të sërfit australian. Ajo kishte kaluar një pjesë të jetës mes Australisë, Kalifornisë dhe Hawaiit, duke ndërtuar një karrierë në modë dhe një komunitet të madh ndjekësish në rrjetet sociale.

Largimi i saj i parakohshëm lë pas dhimbje te familjarët, miqtë dhe fansat, ndërsa vajza e saj e vogël, Snow, mbetet kujtimi më i çmuar i muajve të fundit të jetës së modeles./ Pamfleti

“KORÇA BOOM”