Ish-mësuesja përballet me ndalim të përhershëm pas shkeljeve serioze

Një ish-mësuese në Britaninë e Madhe, Rebecca Joynes, rrezikon të përjashtohet përgjithmonë nga profesioni, pasi një panel i sjelljes profesionale e ka shpallur fajtore për shkelje serioze të etikës në raport me nxënës të mitur.

Joynes, 31 vjeçe, aktualisht po vuan një dënim me burg prej gjashtë vitesh e gjysmë, të dhënë në muajin korrik, pas shpalljes fajtore për disa akuza që lidhen me marrëdhënie të papërshtatshme me nxënës. Ngjarjet lidhen me dy të rinj 15-vjeçarë, të cilët ajo i kishte njohur gjatë punës së saj në një shkollë në zonën e Greater Manchester.

Sipas të dhënave të paraqitura në seancën e Agjencisë së Rregullimit të Mësimdhënies (TRA), e cila u zhvillua në mungesë të saj, u theksua se sjellja e ish-mësueses ka shkaktuar pasoja të konsiderueshme për të rinjtë e përfshirë.

Gjatë shqyrtimit të rastit, u përmend se marrëdhëniet kishin nisur në mënyrë graduale dhe jashtë kufijve profesionalë, ndërsa autoritetet vlerësuan se bëhej fjalë për një shkelje të rëndë të besimit që lidhet me profesionin e mësuesit.

Përfaqësuesja e TRA-së, Shirley Duckworth, e cilësoi rastin si një shkelje serioze të standardeve profesionale, duke theksuar rëndësinë e mbrojtjes së nxënësve dhe respektimit të etikës në arsim.

Joynes i ka mohuar akuzat gjatë gjyqit, por pretendimet e saj nuk janë pranuar nga juria. Ndërkohë, pritet që autoritetet përkatëse të marrin një vendim përfundimtar lidhur me ndalimin e saj të përhershëm nga ushtrimi i profesionit të mësueses.

“KORÇA BOOM”