Ishin vetëm disa centimetra… momenti kur çiklisti shpëtoi mrekullisht nga gremina

Çiklisti amerikan Sepp Kuss përjetoi një moment dramatik gjatë fazës së 20-të të Tur de France, ku për pak i shpëtoi një aksidenti me pasoja fatale.

Kuss, i cili po luftonte për një rezultat të rëndësishëm në etapën parafundore të garës, humbi kontrollin e biçikletës gjatë një zbritjeje të shpejtë malore. Në një kthesë të fortë djathtas, ai gaboi trajektoren dhe u përplas me një mur mbrojtës pasi përshkoi disa korsi të rrugës.

Për fat të mirë, rrjetat e sigurisë në anë të rrugës e ndalën përpara se të përfundonte në greminën pranë pistës së garës. Biçikleta e tij mbeti në rrugë, ndërsa vetë çiklisti përfundoi vetëm pak centimetra larg një rreziku të madh.

Pamjet nga incidenti treguan momentin e frikshëm, ku një ndryshim i vogël në drejtim mund të kishte sjellë pasoja tragjike. Rrjeta mbrojtëse, e vendosur nga organizatorët e garës, rezultoi vendimtare për të shmangur një aksident shumë më të rëndë.

Analisti i TNT Sports, Matt Stevens, vlerësoi masat e sigurisë të marra gjatë Tur de France, duke theksuar rëndësinë e tyre në një garë ku çiklistët përballen me shpejtësi të larta dhe terrene jashtëzakonisht të vështira.

Sepp Kuss arriti të shmangte më të keqen dhe incidenti mbeti vetëm një moment frike në një nga garat më prestigjioze të çiklizmit në botë.

“KORÇA BOOM”