Kantieret e Qukës–Qafë Plloçës ecin me ritme të larta, përfundimi synohet në fillim të vjeshtës

Punimet në të tre lotet e aksit Qukës–Qafë Plloçë po zhvillohen me intensitet dhe progres të dukshëm. Ky projekt, që prej kohësh ka qenë një ndër segmentet më të shumëpritura infrastrukturore në juglindje të vendit, pritet të përfundojë brenda fillimit të vjeshtës, sipas deklaratës së kryeministrit Edi Rama.

Gjatë një përditësimi të shpërndarë në rrjetet sociale, kryeministri theksoi se ky aks do të ketë ndikim të ndjeshëm në lehtësimin e lëvizjes drejt juglindjes, duke reduktuar ndjeshëm kohën dhe distancën e udhëtimit.

Përveç përfitimeve të drejtpërdrejta për qytetarët dhe transportin, pritet që segmenti të krijojë impulse të reja për zhvillimin ekonomik të zonës.

Ndërtimi i këtij aksi është një pjesë e rëndësishme e strategjisë për përmirësimin e infrastrukturës rrugore dhe lidhjen më efikase të rajoneve me njëra-tjetrën. Rruga Qukës–Qafë Plloçë është projektuar për të përballuar një volum të lartë trafiku dhe për të përmbushur standardet moderne të sigurisë rrugore.

Në vijim, autoritetet kanë bërë të ditur se do të ketë mbikëqyrje të vazhdueshme të ecurisë së punimeve për të siguruar që projekti të përmbyllet brenda afateve të planifikuara dhe sipas parametrave të cilësisë së kërkuar.

“KORÇA BOOM”