Klubi i Gramozit në rrugën e privatizimit, mungesa e fondeve publike hap derën për investime nga kompani italiane

Ekipi i Gramozit, që aktualisht konkurron në kategorinë e tretë të futbollit shqiptar, ndodhet në prag të një zhvillimi pozitiv që mund të ndryshojë rrënjësisht të ardhmen e tij. Në fillim të këtij sezoni është mësuar se disa kompani italiane kanë shprehur interes për blerjen e aksioneve të klubit, duke e çuar kështu ekipin drejt një procesi të mundshëm privatizimi.

Ky zhvillim shihet si një mundësi e artë për Gramozin, pasi dihet se kapacitetet financiare të bashkisë që e administron aktualisht janë shumë të kufizuara. Në kushte të tilla, privatizimi përfaqëson alternativën më të qëndrueshme për të garantuar vazhdimësinë dhe rritjen e klubit.

Sipas burimeve pranë drejtuesve të ekipit, procesi i negociatave është drejt finalizimit. Të dyja palët, përfaqësuesit e klubit dhe investitorët italianë, janë duke hedhur hapat e fundit për të konkretizuar marrëveshjen. Kjo nismë pritet të sjellë jo vetëm financime të reja, por edhe përvojë menaxheriale, duke përmirësuar ndjeshëm organizimin dhe infrastrukturën e klubit.

Investimi i parashikuar do t’i japë Gramozit mundësinë për të pasur një strukturë më të fortë sportive dhe organizative, si dhe do të hapë rrugën për objektiva më ambiciozë në të ardhmen, përfshirë ngjitjen në kategori më të larta.

Nëse gjithçka shkon sipas parashikimeve, shumë shpejt Gramozit do t’i jepet një jetë e re, duke kaluar nga mbështetja publike minimale në një strukturë më të fuqishme dhe profesionale, që mund të sjellë një faqe të re për klubin dhe komunitetin sportiv që e mbështet.

“KORÇA BOOM”