Kodi i Ri Penal: Proces i pavarur dhe gjithëpërfshirës, jo arsye për alarm

Së fundmi, disa shoqata të gazetarëve kanë reaguar publikisht duke bërë thirrje për ndërhyrje urgjente në draftin e Kodit të Ri Penal. Ky reagim sugjeron një keqkuptim të procesit që sapo ka nisur, për hartimin dhe diskutimin e këtij drafti.

Është sqaruar qartë nga ministri i drejtësisë se as Ministria e Drejtësisë, e as Këshilli i Ministrave nuk kanë qenë pjesë e hartimit të draftit fillestar. Hartimi i tij i është besuar një grupi të pavarur ekspertësh, të udhëhequr nga Drejtori i Shkollës së Magjistraturës, profesor Arben Rakipi.

Në këtë fazë, qeveria është vetëm një nga palët pjesëmarrëse në procesin e konsultimit. Drafti aktual është në shqyrtim dhe do të analizohen të gjitha qëndrimet, përfshirë edhe ato të qeverisë, në ballafaqim me qëndrimet e grupit të ekspertëve. Të njëjtën gjë u sugjerojmë edhe shoqatave të gazetarëve, të cilat në vend që të alarmohen para kohe, duhet të ndihen të respektuara dhe të ftuara për të kontribuar.

Procesi është i hapur, demokratik dhe transparent. Të gjitha palët e interesuara, përfshirë aktorë të sistemit të drejtësisë, shoqërinë civile dhe mediat, ftohen të analizojnë draftin dhe të paraqesin opinionet e tyre me përgjegjësi dhe argumente. Kjo është rruga e duhur për të ndërtuar një kod penal modern, në përputhje me pritshmëritë e një vendi që synon integrimin në Bashkimin Europian.

Pas përfundimit të kësaj faze konsultimi me të gjitha palët, Ministria e Drejtësisë do të marrë versionin e rishikuar të draftit dhe do ta dërgojë për konsultim në Komisionin Europian. Pa miratimin dhe dakordësinë e Brukselit, drafti nuk mund të procedohet në Kuvend.

Në këtë drejtim, i ftojmë të gjithë aktorët të ruajnë qetësinë dhe të kontribuojnë me seriozitet në këtë proces thelbësor për të ardhmen e shtetit të së drejtës në Shqipëri. Kodi i ri penal nuk është një rrezik për liritë, por një mundësi për përmirësim dhe përafrim me standardet europiane. Shqipëria po ecën drejt Bashkimit Europian, dhe jo drejt modeleve të së kaluarës.

“KORÇA BOOM”