Kr*m mak*bër/ Foshnja e pajetë gjendet e ngrirë brenda një valixheje, nëna fshihte trupin prej 8 muajsh
- 2 minutes ago
- 2 min read
Një ngjarje e rëndë është zbuluar të dielën në zonën Kypseli të Athinës, ku policia greke gjeti trupin e pajetë të një foshnjeje në gjendje ngrirjeje, të vendosur brenda një ene në një valixhe. Autoritetet kanë nisur hetimet për të përcaktuar rrethanat e vdekjes.
Sipas mediave greke, ngjarja u zbulua pas denoncimit të pronarit të një apartamenti me qira afatshkurtër në rrugën Thasou. Pronari njoftoi policinë se personat që qëndronin në banesë nuk kishin paguar dhe refuzonin të largoheshin. Ai gjithashtu ngriti dyshime për përdorim të lëndëve narkotike në apartament.
Efektivë të skuadrës DIAS mbërritën në banesë dhe kryen kontrollin. Sipas raportimeve, brenda apartamentit ndodheshin disa persona, mes tyre një 43-vjeçar grek, vajza e tij 15-vjeçare, një grua gjermane, një shtetas afgan dhe dy fëmijë të mitur.
Gjatë kontrollit, policët gjetën valixhe, të cilat u morën për ekzaminim. Brenda njërës prej tyre u zbulua një enë ku ndodhej trupi i foshnjës në gjendje ngrirjeje. Disa media greke e kanë përshkruar trupin si të një foshnjeje, ndërsa CNN Greece dhe SKAI raportojnë se bëhet fjalë për një fetus rreth shtatë deri në tetë muajsh. Kjo mospërputhje pritet të sqarohet nga ekspertiza mjekoligjore.
Sipas Newsbomb, gruaja gjermane që ndodhej në apartament u tha autoriteteve se foshnja ishte e saj dhe se kishte lindur rreth tetë muaj më parë. Autoritetet nuk kanë përcaktuar ende publikisht shkakun apo kohën e saktë të vdekjes.
Mediat greke raportojnë gjithashtu se në apartament ndodhej një 15-vjeçare dhe një shtetas afgan, i cili dyshohet se është partneri i saj. Informacionet fillestare për rrethanat e tyre dhe pretendimet e tjera që lidhen me çështjen mbeten nën verifikimin e autoriteteve.
Personat që ndodheshin në apartament janë shoqëruar në polici, ndërsa pronari është thirrur për të dhënë dëshminë e tij. Hetimet paraprake vazhdojnë dhe autoritetet presin rezultatet e ekspertizës mjekoligjore, e cila pritet të japë të dhëna për shkakun, kohën dhe rrethanat e vdekjes.
“KORÇA BOOM”
