Tronditëse! Deputetja humb të dyja këmbët pasi u godit nga një makinë, policia flet për sulm të qëllimshëm

Deputetja australiane Helen Haines ka humbur të dyja këmbët pasi u godit nga një automjet në një ngjarje të rëndë që autoritetet policore e kanë cilësuar si sulm të qëllimshëm.

Ngjarja ndodhi të hënën pasdite, jashtë zyrës elektorale të deputetes në Wangaratta, rreth 240 kilometra në verilindje të Melburnit. I dyshuari, 43-vjeçari Brendan Nugent, u arrestua në vendngjarje dhe përballet me disa akuza penale.

Bashkëshorti i deputetes, Phil Haines, konfirmoi se ajo ka pësuar lëndime shumë të rënda, por se gjendja e saj mendore është e mirë. Aktualisht, Helen Haines po merr trajtim mjekësor në Melburn.

“Rruga e Helenës drejt shërimit do të jetë e gjatë dhe e vështirë, por ne e dimë se ajo është një luftëtare”, u shpreh bashkëshorti i saj, duke falënderuar stafin mjekësor dhe të gjithë ata që kanë shprehur mbështetjen e tyre.

Ai e përshkroi ngjarjen si shkatërruese për familjen, duke theksuar se fakti që deputetja ka mbijetuar është një lajm i mirë për ta.

I dyshuari përballet me disa akuza

Brendan Nugent u paraqit të mërkurën për herë të parë në gjykatë, ku u përball me tri akuza, përfshirë drejtimin e rrezikshëm të automjetit që shkakton lëndime të rënda, shkaktimin e qëllimshëm të lëndimeve të rënda dhe dëmtimin e një zyrtari publik të Komonuelthit.

Ai nuk kërkoi lirimin me kusht dhe pritet të paraqitet sërish në gjykatë në muajin shkurt. Sipas dokumenteve gjyqësore, ndaj tij janë ngritur gjithashtu akuza për kultivim dhe posedim kanabisi.

Policia ka bërë të ditur se mund të shqyrtohen edhe akuza të tjera, përfshirë tentativën për vrasje.

Sipas autoriteteve, i dyshuari nuk kishte qenë më parë në vëmendjen e policisë dhe nuk kishte pasur informacione për kërcënime ndaj deputetes përpara incidentit. Hetuesit po shqyrtojnë nëse përdorimi i drogës ose i ilaçeve mund të ketë ndikuar në ngjarje, si dhe nëse ekzistonte ndonjë lidhje personale mes tyre.

Familjarë të të dyshuarit kanë deklaruar se kishin qenë prej kohësh miq me Helen Haines, duke e cilësuar ngjarjen si të paimagjinueshme dhe shkatërruese.

“KORÇA BOOM”