Lajm i trishtë: Aksidenti i merr jetën punonjësit të burgut të Drenovës

Ka ndërruar jetë K. Ç, drejtuesi i mjetit të aksidentuar ditën e sotme në fshatin Lumalas, në aksin Korçë–Maliq.

Sipas informacioneve, 45-vjeçari ka humbur jetën në ambientet e spitalit të Korçës, pavarësisht përpjekjeve të stafit mjekësor për ta mbajtur në jetë.

Çekiçi ishte punonjës i policisë së burgjeve pranë IEVP Drenovë dhe u përfshi në një aksident të rëndë rrugor, rrethanat e të cilit mbeten ende të paqarta. Autoritetet po vijojnë hetimet për zbardhjen e plotë të ngjarjes.

Ngjarja ka shkaktuar tronditje në komunitetin lokal, ku 45-vjeçari njihej si një person i përkushtuar në detyrën e tij.

Aksidenti ndodhi në një moment kur trafiku në këtë aks ishte i ngarkuar, ndërsa priten detaje të tjera zyrtare nga policia lidhur me shkaqet e ngjarjes.

“KORÇA BOOM”