Lukra: Devolli po ndërtohet me qetësi dhe cilësi, grupi drejt konsolidimit të plotë

Skuadra e Devollit po kalon një fazë përgatitore mjaft pozitive, jo vetëm për nga rezultatet në ndeshjet miqësore, por edhe për nga atmosfera dhe puna e organizuar brenda grupit. Në dy përballjet e fundit, Devolli ka marrë fitore domethënëse: 2-1 ndaj Skënderbeut U-19 dhe 3-1 ndaj ekipit të Sopotit, duke treguar se puna e bërë gjatë këtyre javëve po jep frytet e para.

Përveç rezultateve, vëmendje të veçantë po merr edhe qasja serioze dhe profesionale me të cilën po punohet. Stafi teknik dhe drejtuesit kanë ndërtuar një ambient të qetë dhe të sigurt, ku lojtarët ndihen të përqendruar dhe të motivuar. Qetësia në stërvitje, bashkëpunimi në grup dhe përkushtimi maksimal janë disa nga elementët që po japin garanci për një sezon të suksesshëm.

Ekzekutivi i klubit, Ermir Lukra, u shpreh optimist mbi ecurinë e skuadrës:

"Mund të them se jemi shumë optimistë. Grupi është drejt konsolidimit të plotë dhe afrimet kanë qenë cilësore. Kemi krijuar një ambient të shëndetshëm dhe të balancuar, ku lojtarët ndihen të sigurt dhe të fokusuar. Do të jemi aktivë edhe në merkato për dy futbollistë të tjerë dhe bisedimet po ecin shumë mirë. Besoj se brenda kësaj jave ekipi do të jetë i kompletuar."

Me këtë ritëm dhe seriozitet, Devolli synon të ndërtojë një skuadër konkurruese, e cila jo vetëm të përmbushë pritshmëritë e drejtuesve, por të surprizojë edhe në fushën e lojës me një futboll cilësor dhe të qëndrueshëm.

“KORÇA BOOM”