Ndryshime të mëdha në sektorin e ndërtimit, ndalohen shitjet e parakohshme

Kryeministri Edi Rama ka njoftuar ndalimin e menjëhershëm të praktikës së njohur si “shitje në gropë” – pra, shitjen e apartamenteve para përfundimit të ndërtimit. Ky vendim pritet të sjellë një tronditje të konsiderueshme në tregun e pasurive të paluajtshme, sidomos në kryeqytet.

Për vite me radhë, kjo formë shitjeje ka qenë thelbësore për zhvilluesit, të cilët siguruan kapital të nevojshëm nga blerësit për të financuar projektet e tyre. Me ndalimin e kësaj praktike, synimi është mbrojtja e konsumatorëve nga rreziqet që lidhen me projektet e papërfunduara dhe rritja e transparencës në treg.

Sipas ekspertëve, në fazën fillestare pritet një periudhë pasigurie dhe ngadalësim i ritmit të tregut. Megjithatë, afatmesëm, vendimi mund të sjellë ulje të çmimeve dhe një sistem më të qëndrueshëm, ku financimi kalon përmes bankave dhe jo më nga paradhëniet e qytetarëve.

Zhvilluesit do të përballen me sfida të reja, përfshirë nevojën për më shumë kapital fillestar dhe rishikimin e strategjive të financimit të projekteve.

“KORÇA BOOM”