Ndërhyrje urgjente për të shpëtuar mbi 700 pemë të reja në kodrat e Korçës

Temperaturat e larta të ditëve të fundit kanë vënë në rrezik mbi 700 fidanë pemësh të mbjella me iniciativë qytetare në kodrat mbi qytetin e Korçës, në zonën pranë kishës së Shën Thanasit.

Thatësira e zgjatur dhe mungesa e reshjeve kanë bërë që fidanët të jenë të ekspozuar ndaj tharjes masive, duke rrezikuar të dështojë një investim i rëndësishëm mjedisor dhe qytetar.

Për të shpëtuar këta fidanë, që nga mbrëmja e djeshme dhe në orët e para të mëngjesit të sotëm, janë ndërmarrë ndërhyrje intensive me mjete private dhe ndihmë vullnetare.

Ardit Konomi, një nga nismëtarët kryesorë të këtij projekti, u shpreh se janë bërë përpjekje të jashtëzakonshme për të siguruar ujitjen e fidanëve përmes boteve me ujë tërhequr nga mjete private dhe përfshirjes së qytetarëve të angazhuar.

“E kemi për detyrë të mos lejojmë që gjithë ky angazhim qytetar dhe mjedisor të shkojë dëm për shkak të kushteve të motit. Po bëjmë maksimumin me mjetet që kemi në dispozicion, por na nevojitet edhe më shumë mbështetje për të garantuar vazhdimësinë”, u shpreh Konomi.

Nisma për gjelbërimin e kodrave është ndërmarrë vitin e fundit si pjesë e përpjekjeve për përmirësimin e mjedisit dhe rikthimin e hapësirave të gjelbra në qytetin e Korçës.

Ajo është realizuar përmes kontributeve të qytetarëve, shoqatave dhe mbështetjes së komunitetit lokal.

Apeli i nismëtarëve është i qartë: nevojitet ndihmë nga strukturat përkatëse dhe qytetarët për të garantuar mbijetesën e pemëve, si dhe për të ruajtur gjelbërimin që po i rikthehet zonës përreth qytetit.

“KORÇA BOOM”