Nga 0.05% në 0.2%: Si do të ndryshojë taksa për banesat nga 2028

Zbatimi i taksës së re për pasuritë e paluajtshme, i cili fillimisht ishte planifikuar të hynte në fuqi në vitin 2026, do të shtyhet me dy vite dhe pritet të nisë në vitin 2028.

Nga Ministria e Financave bëhet e ditur se është në proces hartimi një projektligj i ri, i cili do të miratohet gjatë vitit 2026 dhe do të hyjë në fuqi bashkë me Kadastrën Fiskale në vitin 2028. Shtyrja vjen pas konsultimeve dhe përgatitjeve të nevojshme për ndërtimin e një sistemi modern taksimi, i cili do të bazohet në vlerën e tregut të pasurive të paluajtshme.

Projektligji i mëparshëm, i publikuar për konsultim në vitin 2023, parashikonte fillimin e taksimit të ri për ndërtesat në vitin 2026 dhe për parcelat, truallin dhe tokën bujqësore në vitin 2028.

Sipas propozimeve të asaj kohe, niveli i taksës do të ishte:

• Nga 0.1% deri në 0.2% për ndërtesat rezidenciale (krahasuar me normën aktuale prej 0.05%);

• Nga 0.15% deri në 0.25% për ndërtesat tregtare (krahasuar me 0.2% aktualisht);

• Nga 0.15% deri në 0.25% për ndërtesat bujqësore dhe industriale.

  
  

Drafti i ri që po përgatitet nuk pritet të ndryshojë koeficientët e taksës për ndërtesat, truallin dhe tokën bujqësore të propozuara më herët, të cilat janë përputhur me standardet e vendeve të rajonit.

Qëllimi i këtij reformimi është kalimi nga një sistem taksimi i bazuar vetëm në vlerën e ndërtesave dhe në sipërfaqen e tokës, në një sistem të unifikuar dhe modern, i cili bazohet në vlerën e tregut si për ndërtesat, ashtu edhe për tokën.

Vlera e pasurive do të përcaktohet përmes një harte të re me çmime mesatare referuese, të ndara sipas kategorive: njësitë rezidenciale, njësitë e shërbimit dhe parcelat, përfshirë truallin, tokën bujqësore dhe atë pyjore. Kjo bazë do të mbështetet në çmimet reale të tregut dhe kontratat e shitblerjes, duke përcaktuar zona të reja për vlerësimin e pronës.

Edhe pse në formulën e re parashikohet një zbritje prej 50% të vlerës për banesën e parë, dyfishimi i shkallës së taksës (nga 0.05% në 0.1% deri në 0.2%) do të sillte rritje të detyrimeve. Sipas dokumentit “Reforma e taksës së pasurisë 2024–2028”, kjo do të nënkuptonte një rritje nga 18% deri në 50% për ndërtesat rezidenciale dhe deri në 28% për dyqanet.

“KORÇA BOOM”