Nga bankat e shkollës në përqafimet e nostalgjisë / Një takim që zgjoi zemrat pas 40 vitesh

Pas katër dekadash që rrugët i kishin ndarë në drejtime të ndryshme të jetës, ish-nxënësit e maturës së vitit 1984 të gjimnazit të njohur "Raqi Qirinxhi" në Korçë u ribashkuan në një takim emocionues dhe plot mall. Ky moment solli rikujtimin e viteve të rinisë, kujtimeve të paharruara dhe shoqërisë që, pavarësisht kohës, ka mbetur e fortë në zemrat e të gjithëve.

Takimi u zhvillua në një atmosferë të ngrohtë dhe miqësore, ku nuk munguan përqafimet, lotët e gëzimit dhe historitë që fillonin me fjalët “kujton kur…”. Ish-mësuesit, të pranishëm në këtë ngjarje, u pritën me shumë dashuri dhe mirënjohje, duke i dhënë edhe më shumë vlerë këtij ribashkimi.

Gjatë takimit, shumë nga pjesëmarrësit ndanë përvojat e jetës së tyre pas mbarimit të gjimnazit – që nga karrierat profesionale e deri te krijimi i familjeve, duke treguar se rrënjët e përbashkëta të arsimimit dhe edukatës në "Raqi Qirinxhi" kanë lënë gjurmë të thella.

Takimi u mbyll me një premtim: që ky të mos jetë i fundit.

Me dëshirën për ta kthyer këtë traditë në një zakon të bukur, ish-nxënësit vendosën që të ribashkohen sërish në vitet që vijnë, për të mos lënë që koha t’i ndajë më gjatë.

“KORÇA BOOM”