Nga Flamurtari te Pogradeci – Fabio Hasa gati për të shkruar historinë e ngjitjes në elitë

Klubi i Futbollit Pogradeci ka zyrtarizuar një tjetër lëvizje të rëndësishme në merkaton e verës, duke shtuar në radhët e tij mesfushorin Fabio Hasa. Futbollisti 23-vjeçar, i njohur për shpirtin luftarak dhe vizionin në fushë, ka bindur stafin teknik gjatë ndeshjes miqësore ndaj Dinamos dhe tashmë ka firmosur me liqenorët.

Transferimi i Hasës vjen si pjesë e një strategjie të qartë të klubit pogradecar për të forcuar skuadrën dhe për të synuar ngjitjen në Kategorinë Superiore, një objektiv që nuk fshihet më as nga drejtuesit e klubit dhe as nga vetë futbollistët.

Menjëherë pas firmës, Fabio Hasa ka dhënë edhe deklaratën e tij të parë si lojtar i Pogradecit:

“Tani jam pjesë e Pogradecit. I uroj shumë suksese Flamurtarit, një klub që e respektoj dhe ku kam kaluar një fazë të rëndësishme të karrierës. Por tani kam një mision të ri: të ndihmoj Pogradecin të ngjitet në elitë. Unë besoj fort se kjo do të ndodhë. Grupi është i motivuar, klubi është serioz dhe qyteti e do futbollin me pasion të madh.”

Me këtë lëvizje, Pogradeci dërgon një sinjal të qartë për rivalët: rikthimi në Superiore nuk është vetëm një dëshirë, por një objektiv konkret. Me lojtarë si Hasa dhe përforcime të tjera të mundshme në horizont, skuadra duket gjithnjë e më gati për të qenë një pretendent serioz për sezonin 2025–2026.

“KORÇA BOOM”