Nga Xhevdet Zekaj / Kur Humbja nuk ështe fundi, por fillimi. Në futboll ka edhe humbje – por jo dramë

Disfata e KF Egnatia në Islandë ishte e rëndë dhe zhgënjyese për të gjithë: drejtuesit, trajnerin, lojtarët, stafin dhe tifozët. Por nuk është fundi i botës, as arsye për të mohuar gjithë rrugëtimin dhe sakrificën që kjo skuadër ka bërë për të arritur këtu. Në futbollin europian, ka fitore të mëdha dhe humbje të thella – edhe për më të mëdhenjtë.

Disa rezultate të paharrueshme e tregojnë këtë më mirë se fjalët:

• Barcelona 2–8 Bayern Munich

• Manchester United 0–7 Liverpool

• Real Madrid 0–4 Manchester City

• Liverpool 2–5 Real Madrid në "Anfield"

• Al Ahly 4–2 Real Madrid

  
  

Këto humbje nuk i rrëzuan klubet, as nuk sollën dorëheqje impulsive. Sepse sporti kërkon vazhdimësi dhe profesionalizëm. E njëjta filozofi duhet të na udhëheqë edhe ne.

Nuk humbëm nga euforia. Humbëm sepse ndodh. Sepse është futboll.

Ka një perceptim të gabuar se Egnatia e nënvlerësoi kundërshtarin. E vërteta është se ekipi udhëtoi me mungesa serioze në formacion:Ujka, Lushkja, Ndreca, Ajme, Jefferson jashtë loje.Bakayoko, Aliev, Melo – në fushë me dëmtime, duke luajtur me injeksione dhe përkushtim maksimal.

Kur mungojnë 5–6 titullarë dhe përballë ke një kundërshtar si Breidablik – që vetëm një sezon më parë ka qenë në grupet e Conference League – rreziku është real. Humbja nuk ishte pasojë e neglizhencës, por e kushteve reale të sfidës.

Reagimi nuk është dorëheqje. Është qëndrueshmëri.

Në futbollin modern, një ndeshje nuk përcakton fatin e një projekti.Simone Inzaghi humbi 5–0 me PSG – dhe vazhdoi.Luis Enrique qëndroi pas humbjes me Chelsea.Xabi Alonso u mposht 4–0 nga PSG në Champions, humbi 0–4 finalen me Atalantën – por e përfundoi sezonin me Leverkusen si një nga më të suksesshmit në histori.

Sepse sot futbolli matet me vizion afatgjatë, jo me emocione kalimtare.

Ky është projekti Egnatia. Me themel. Me punë të përditshme. Me përkushtim dhe profesionalizëm. Fitoret në kampionatin shqiptar, në Kupë dhe në Superkupë nuk ishin rastësi. Ishin rezultat i një ndërtimi të qëndrueshëm.

Humbja në Islandë është sinjal – jo alarm.

Është mësim – jo dramë.

Është pikë reflektimi – jo kthesë paniku.

Europa është e ashpër, por rruga për t’u rritur kalon përmes sfidave të tilla.

KF Egnatia do të vazhdojë. Më e përulur. Më e fortë. Më e përgatitur.

Ky është mesazhi: një ndeshje nuk është fundi. Është fillimi i një kuptimi të ri, i një rritjeje tjetër, i një ëndrre më të madhe.

Në futboll, nuk të gjykojnë për atë që ke fituar dje – por për atë që po ndërton sot.

Ne po ndërtojmë. Dhe nuk do të ndalemi.

Forca KF Egnatia!

“KORÇA BOOM”