Ngjarje / përplasje mes makinës dhe motorit të policisë

Një aksident rrugor është regjistruar në qytetin e Durrësit, ku një motor i Policisë Rrugore është përplasur me një automjet që drejtohej nga një shtetase me inicialet J. D.

Ngjarja ka ndodhur rreth orës 10:35 të paradites, në rrugën “Taulantia”, një nga akset më të frekuentuara të qytetit.

Sipas informacioneve paraprake, automjeti është përplasur me motorin e Policisë Rrugore, i cili drejtohej nga efektivi me inicialet E. M., i cili ndodhej në krye të detyrës në momentin e aksidentit.

Si pasojë e përplasjes, efektivi ka pësuar dëmtime të lehta fizike. Ai është transportuar menjëherë në Spitalin Rajonal të Durrësit për të marrë ndihmën e nevojshme mjekësore dhe, fatmirësisht, ndodhet jashtë rrezikut për jetën.

Në vendngjarje ka mbërritur grupi hetimor, i cili po punon për të zbardhur rrethanat e plota të aksidentit dhe për të përcaktuar shkaqet dhe përgjegjësitë e mundshme të palëve të përfshira.

"KORCA BOOM"