Në pistë me krenari / Historia e tre ikonave të atletikës shqiptare që lindën në Korçë

Tre vajza korçare, krenare për gjithçka që kanë arritur në karrierën e tyre sportive, qëndrojnë sot si një simbol frymëzimi mes dhjetëra kampioneve që kanë shkëlqyer ndër vite në historinë e atletikës shqiptare, duke mbajtur me nder emrin e madh të klubit “Skënderbeu”.

Në këtë foto historike paraqiten tri prej figurave më të spikatura të atletikës korçare:

– Alma Qeramxhi, një sportiste e gjithanshme, kampione dhe rekordmene në disa disiplina sfiduese si 7-garëshi, kërcimi së larti dhe vrapimi me pengesa. Ajo përfaqëson modelin e atletit të përkushtuar dhe të palodhur, që ka lënë gjurmë të pashlyeshme në historinë e atletikës.

– Alma Thano, e njohur ndryshe si “Shigjeta e Artë”, ka qenë një nga sprinteret më të shpejta të kohës së saj. Kampione dhe rekordmene në garat e 100 dhe 200 metrave, ajo është bërë një emër i njohur për shpejtësinë, teknikën dhe qëndrueshmërinë në pistë.

– Fatbardha Rama, një tjetër emër i rëndësishëm në historinë e atletikës korçare, ka shkëlqyer në disiplinën e kërcimit së larti.

Ajo ka arritur rezultate të larta dhe ka përfaqësuar me dinjitet klubin e saj në garat kombëtare.

Këto tre kampione nuk janë vetëm krenari për qytetin e Korçës dhe klubin “Skënderbeu”, por edhe dëshmi e qartë e faktit se përkushtimi, pasioni dhe puna e palodhur e vajzave shqiptare mund të sjellë arritje të jashtëzakonshme.

Sa shumë histori, sa shumë krenari që rrjedh nga këto sportiste të forta të atletikës sonë.

“KORÇA BOOM”