Pa gola, por me shumë tension – Dinamo dhe Bylisi ndahen në barazim në "Selman Stërmasi"

Në stadiumin "Selman Stërmasi", Dinamo dhe Bylis nuk shkuan më shumë se një barazim pa gola, në një përballje ku nuk munguan emocionet, rastet për shënim dhe një karton i kuq.

Ndeshja nisi me kujdes nga të dyja skuadrat, të cilat në minutat e para kërkuan të stabilizohen në fushë. Malomo pati një rast të artë në minutën e 13-të, por e shpërdoroi përballë portierit Teqja. Dinamo u përpoq të reagonte me tentativa nga distanca, por gjuajtjet e Bregut dhe Gudiabit përfunduan jashtë.

Rasti më i rrezikshëm i pjesës së parë erdhi në minutën e 39-të, kur Përndreca gjuajti fort, por Teqja reagoi në kohë. Ualison nuk arriti të përfitonte nga topi i kthyer dhe sinjalizohet për pozicion jashtë loje. Pjesa e parë u mbyll pa gola, me pak raste dhe shumë duele në mesfushë.

Në fraksionin e dytë, Dinamo ishte më kërkuese, por pa saktësinë e duhur në finalizim. Në minutën e 55-të, Vashu shpëtoi Bylisin nga një gol i sigurt, ndërsa pak minuta më vonë, Peralta u ndëshkua me karton të kuq pas një goditjeje me bërryl ndaj Ditës, vendim i marrë pas konsultimit me VAR.

Me një lojtar më shumë, Dinamo tentoi të përfitonte, por shpërdoroi disa mundësi të mira me Bregun dhe Qefalijan. Në fundin e takimit, tensioni u rrit dhe u akorduan disa kartonë të verdhë për vonesa dhe ndërhyrje të ashpra.

Në minutën e 90+8, gjyqtari vërshëlleu përfundimin e ndeshjes, duke vulosur një barazim 0-0 që lë shije të hidhur për Dinamon, që kishte avantazhin numerik për më shumë se 20 minuta, ndërsa Bylisi mori një pikë me vlerë në transfertë.

“KORÇA BOOM”