Panik, një person hyn me forcë në zyrën e kryetarit të bashkisë

Një incident i rëndë ndodhi mëngjesin e sotëm në Bashkinë e Agrinjos, Greqi, kur një person hyri me forcë në zyrën e kryetarit të bashkisë, Giorgos Papanastasiou, duke sjellë kërcënime verbale dhe duke sulmuar një punonjës të institucionit.

Sipas informacioneve nga media “Protothema”, bëhet fjalë për një burrë të moshës së mesme, i cili më parë kishte shkaktuar trazira duke ndërprerë një mbledhje të Këshillit Bashkiak me britma.

Sot, ai hyri në katin e shërbimeve të Bashkisë, duke trokitur në dyert e zyrave dhe duke shfaqur sjellje agresive. Dyshohet se ka goditur kryetarin e bashkisë me një çadër, ndërsa punonjësi që u përpoq ta qetësonte u kafshua nga autori.

Policia dhe një ambulancë e EKAB u thirrën menjëherë në vendngjarje. Autori u arrestua dhe u dërgua në Departamentin e Policisë së Akarnanisë.

Sipas informacionit paraprak, ky është i njëjti person që muajt e fundit ka telefonuar vazhdimisht në Bashki, duke ofenduar punonjësit dhe duke shkaktuar shqetësim të përsëritur në institucion.

"KORCA BOOM"