Pas bllokimit disa mujor, TikTok rikthehet në Shqipëri

Këshilli i Ministrave ka vendosur sot heqjen e masave të përkohshme për ndërprerjen e aksesit në platformën “TikTok”, duke i hapur rrugë rikthimit të aplikacionit në territorin e Republikës së Shqipërisë, pas bllokimit të vendosur më 13 mars 2025.

Në vendimin e miratuar thuhet se Autoriteti Kombëtar për Sigurinë Kibernetike (AKSK), në bashkëpunim me entet rregullatore përkatëse, do të ndërmarrë veprimet e nevojshme për heqjen e masave të bllokimit të aksesit në këtë platformë, duke respektuar legjislacionin në fuqi për mbrojtjen e të dhënave personale.

Kryeministri Edi Rama kishte deklaruar më herët se mbyllja e TikTok do të ishte e përkohshme dhe se platforma do të rihapej sapo të arrihej dakordësia me kompaninë kineze për vendosjen e filtrave të sigurisë. Sipas tij, masa ishte marrë për shkak të ndikimit të pretenduar negativ të platformës në shëndetin psiko-emocional të fëmijëve.

Vendimi i Këshillit të Ministrave

Në mbështetje të nenit 100 të Kushtetutës dhe dispozitave përkatëse ligjore për komunikimet elektronike, mediat audiovizive dhe mbrojtjen e të drejtave të fëmijëve, Këshilli i Ministrave vendosi:

• Heqjen e masave të përkohshme për ndërprerjen e aksesit në platformën online “TikTok”, pas adresimit të problematikave në fushën e sigurisë publike dhe sociale në mjedisin digjital;

  
  

• Ngarkimin e AKSK-së, në bashkëpunim me entet rregullatore, për zbatimin e vendimit;

  
  

• Shfuqizimin e vendimit nr. 151, datë 6.3.2025, që parashikonte bllokimin e përkohshëm të platformës;

  
  

• Ngarkimin e ministrive përkatëse dhe institucioneve përgjegjëse për ndjekjen e zbatimit të vendimit.

  
  

Reagimet dhe kritikat

Kujtojmë se vendimi për bllokimin e TikTok ishte kundërshtuar asokohe nga rreth 20 organizata për mbrojtjen e të drejtave të njeriut, të cilat e cilësuan atë si një “kufizim ekstrem” të lirisë së shprehjes.

"KORCA BOOM"