Pesë të lënduar nga një aksident, mes tyre edhe gra e fëmijë

Një aksident rrugor ka ndodhur pak minuta më parë në Rrugën e Arbrit, pranë një fshati në afërsi të qytetit të Klosit. Sipas informacioneve të para nga terreni, pesë persona, të gjithë pjesëtarë të së njëjtës familje, kanë mbetur të lënduar si pasojë e përplasjes.

Të plagosurit kanë marrë ndihmën e parë në qendrën shëndetësore të Klosit dhe më pas janë transportuar me ambulancë drejt spitalit të Burrelit për trajtim të mëtejshëm.

Në vendin e ngjarjes ndodhen forcat e policisë dhe grupi hetimor, të cilët po punojnë për të përcaktuar shkaqet e aksidentit. Deri më tani, nuk ka të dhëna të detajuara mbi gjendjen shëndetësore të të lënduarve apo rrethanat konkrete të ngjarjes.

Rruga e Arbrit, e cila lidh Tiranën me verilindjen e vendit, ka qenë shpeshherë objekt shqetësimi për shkak të aksidenteve të shpeshta, veçanërisht në segmente me dukshmëri të kufizuar apo pa sinjalistikë të plotë.

Pritet që autoritetet të japin më shumë detaje në vijim, ndërsa familjarët e të lënduarve janë duke u mbajtur në dijeni nga mjekët e spitalit.

“KORÇA BOOM”