Policia Kufitare kap rast të transportimit të paligjshëm të 410 bagëtive të imëta, 4 veterinerë procedohen penalisht

Shërbimet e Policisë Kufitare kanë intensifikuar kontrollet për parandalimin, evidentimin dhe goditjen e shkeljeve ligjore në fushën e transportit të bagëtive të imëta.

Si rezultat i kontrolleve të shtuara për zbatimin e urdhrit të Ministrit të Bujqësisë për ndalimin e përkohshëm të lëvizjes së bagëtive të imëta, është evidentuar një rast i transportimit të kundërshtuar të bagëtive.

Gjatë kontrollit në fshatin Barmash, në zonën e Ersekës, Policia ka konstatuar një automjet që po transportonte nga Konispoli plot 410 bagëti të imëta.

Në vijim të veprimeve hetimore, specialistët për Hetimin e Krimeve të Drejtorisë Vendore të Policisë Korçë referuan materialet në Prokurori, ku filloi procedimi penal për shtetasit A. Sh., 58 vjeç, D. L., 53 vjeç, M. N., 53 vjeçe dhe S. I., 57 vjeç, banues në Sarandë dhe Korçë, të cilët janë veterinerë përgjegjës për zbatimin e urdhrit nr. 575, datë 09.06.2025, të Ministrisë së Bujqësisë për ndalimin e përkohshëm të lëvizjes së kafshëve të gjalla të llojit dhen dhe dhi në territorin e Republikës së Shqipërisë.

Ata po procedohen penalisht për veprën “Shpërdorimi i detyrës”, pasi nuk kanë marrë masat e nevojshme për zbatimin e këtij urdhri.

“KORÇA BOOM”