Presidenti Begaj lëviz ambasadat, ndryshime të mëdha në përfaqësitë shqiptare

Presidenti i Republikës, Bajram Begaj, ka dekretuar sot lirimin nga detyra të pesë ambasadorëve të Republikës së Shqipërisë, si rezidentë ashtu edhe jorezidentë.

Mes tyre përfshihen Riza Poda, i cili shërbente si Ambasador i Jashtëzakonshëm dhe Fuqiplotë në Republikën Popullore të Kinës, si dhe njëkohësisht në disa vende të tjera aziatike në cilësinë e ambasadorit jorezident. Po ashtu është liruar nga detyra Bardhyl Canaj, ambasador në Republikën e Serbisë.

Nga detyra është liruar edhe Sami Shiba, i cili mbante postin e ambasadorit në Republikën Arabe të Egjiptit, si dhe një sërë akreditimesh jorezidente në disa shtete të Lindjes së Mesme dhe Afrikës.

Në listë përfshihen gjithashtu Vasilika Hysi, ambasadore në Misionin e Përhershëm pranë OKB-së dhe organizatave ndërkombëtare në Gjenevë, si dhe Albana Dautllari, ambasadore në Mbretërinë e Belgjikës dhe njëkohësisht e akredituar edhe në Luksemburg.

Në të njëjtin vendim, Presidenti Begaj ka dekretuar edhe emërimin e dy ambasadorëve të rinj. Gazmend Barbullushi është emëruar ambasador në Mbretërinë e Belgjikës dhe njëkohësisht në Dukatin e Madh të Luksemburgut. Ndërkohë, Albana Dautllari është emëruar ambasadore në Misionin e Republikës së Shqipërisë pranë Bashkimit Evropian.

Këto ndryshime vijnë në kuadër të riorganizimeve në shërbimin diplomatik shqiptar, duke prekur disa prej përfaqësive kryesore të vendit jashtë territorit.

“KORÇA BOOM”