Reagimi i Federatës Serbe pas ndeshjes në Tiranë: Falënderime për mikpritjen, dënim për sjelljet në tribuna

Federata e Futbollit të Serbisë ka reaguar pas ndeshjes së zhvilluar në Tiranë, duke falënderuar Federatën Shqiptare të Futbollit për mikpritjen, por njëkohësisht ka dënuar sjelljet e disa tifozëve në tribuna, të cilat i konsideron të papranueshme dhe të rrezikshme.

"Futbolli në Tiranë përjetoi humbjen më të madhe – në tribuna të Stadiumit Kombëtar," thuhet në reagim.

"Dëshirojmë të theksojmë faktin se e gjithë ekspedita e Federatës së Futbollit të Serbisë, nga minuta e parë e deri në atë të fundit të qëndrimit në kryeqytetin shqiptar, është pritur në mënyrë të shkëlqyer nga Federata e Futbollit të Shqipërisë dhe presidenti Armand Duka. Që nga pritja në aeroport deri te largimi nga Tirana, ndjemë respekt dhe kujdes."

"Fatkeqësisht, skenat nga tribuna që bota e futbollit nuk dëshiron t’i shohë, skena me të cilat UEFA përmes trupave dhe rregulloreve të saj po lufton për vite me radhë, hodhën një njollë të madhe mbi atë që ndodhi në mënyrë të drejtë dhe korrekte në fushë."

Federata serbe dënon ashpër shpërthimet politike të urrejtjes, përmes provokimeve dhe thirrjeve që sipas tyre përkrahin organizata të ndaluara dhe nxisin krime të reja.

"Kur fjalët nuk mjaftuan, erdhi edhe rrezikimi fizik i futbollistëve tanë. Nga tribuna u hodhën monedha, gota dhe shishe të mbushura. Në disa raste, gjyqtari italian u detyrua të ndërpresë ndeshjen. U dëgjua edhe spikeri zyrtar i stadiumit, por gjithçka mbeti pa rezultat. Pamjet e turpshme që filluan me fishkëllima ndaj himneve, e vazhduan me brohoritje skandaloze dhe goditje ndaj lojtarëve serbë, jo vetëm që cenojnë shpirtin sportiv dhe atmosferën e fair-play-t, por edhe shkelin drejtpërdrejt parimet e respektit dhe tolerancës ndërkombëtare që futbolli duhet t’i promovojë."

"Duke falenderuar Federatën e Futbollit të Shqipërisë për mikpritjen dhe pritjen e mirë gjatë qëndrimit në Tiranë, ne dënojmë gjithçka që është dëgjuar dhe parë nga tribuna e Stadiumit Kombëtar."

“KORÇA BOOM”