Set final prej “zemrash të forta”: Pogradeci mposht Dinamon pas një beteje epike

Pogradeci-Dinamo 3-2

(22-25, 25-23, 22-25, 30-28, 21-19)

Rivalitet dhe nivel i lartë loje në Pogradec, aty ku është zhvilluar një ndeshje shumë emocionuese mes ekipit vendas dhe Dinamos në volejboll për femra. Dy skuadra me ambicie të qarta për fitimin e titullit kampion dhuruan një përballje të fortë dhe të bukur, ku çdo set u karakterizua nga diferenca të vogla pikësh dhe luftë në çdo moment.

Në setin e parë ishte Dinamo ajo që triumfoi, por vetëm në pikët e fundit, pasi rivaliteti ishte i pranishëm gjatë gjithë kohës. Skuadra e trajnerit Orlando Kojo e fitoi setin 22-25. Në setin e dytë reagoi ekipi liqenor i Besnik Lishës, duke e fituar atë me rezultatin 25-23 dhe duke barazuar ndeshjen.

Seti i tretë shkoi sërish në favor të Dinamos, që fitoi 22-25. Ndërsa seti i katërt ishte më i forti deri në atë moment. Dinamo krijoi shkëputje fillestare 12-17, por Pogradeci rikuperoi dhe vendosi baraspeshën në 22-22, më pas 24-24, për ta fituar më pas me rezultat dramatik 30-28. Ndeshja shkoi kështu në setin e pestë.

Në setin final, Dinamo kaloi fillimisht në avantazh 2-4, çka bëri që trajneri Lisha të kërkonte pushimin e parë. Pas këtij momenti loja u barazua plotësisht. Pogradeci kaloi në epërsi 8-5, kur edhe u ndërruan fushat. Më pas Dinamo reagoi dhe riktheu ekuilibrin 14-14. U deshën pikë shtesë për të përcaktuar fituesin.

Pas një fundi dramatik dhe me tension të lartë, Pogradeci fitoi 21-19 dhe mori një fitore të madhe në një ndeshje që vërtetoi se të dyja skuadrat janë pretendente serioze për titullin kampion.

“KORÇA BOOM”