Shpërthen pas 500 vitesh vullkani Krasheninnikov në Rusi – lidhje e mundshme me tërmetin 8.8 ballë

Një ngjarje e rrallë dhe e frikshme ka tronditur Lindjen e Largët të Rusisë: për herë të parë pas më shumë se 500 vjetësh, vullkani Krasheninnikov në gadishullin Kamchatka ka shpërthyer gjatë natës, duke hedhur një re hiri deri në gjashtë kilometra në lartësi.

Ministria e Emergjencave e Rusisë ka bërë të ditur se për momentin nuk ka rrezik për zonat e banuara përreth, megjithëse situata monitorohet nga afër. Ekspertët e lidhin shpërthimin me tërmetin masiv që goditi rajonin pak ditë më parë me magnitudë 8.8 ballë – një ndër më të fortët e regjistruar ndonjëherë në Rusi.

Shkencëtarja ruse Olga Girina, drejtuese e Ekipit të Reagimit ndaj Shpërthimeve Vullkanike në Kamchatka, deklaroi se aktiviteti sizmik i ditëve të fundit mund të ketë qenë një faktor nxitës për rikthimin në aktivitet të këtij vullkani të fjetur për pesë shekuj.

Pas shpërthimit, zona u trondit edhe nga një tjetër tërmet me magnitudë 7.0 ballë që goditi Ishujt Kuril, duke nxitur paralajmërime për cunami në tre rajone të ndryshme të gadishullit. Sipas autoriteteve ruse, ky tërmet mund të krijojë valë detare deri në 18 centimetra lartësi.

Ky zinxhir ngjarjesh ka vënë në alarm autoritetet, edhe pse Kamchatka është një nga zonat më të largëta dhe më pak të populluara të vendit. Megjithatë, fakti që ndodhet në të ashtuquajturën “Unaza e Zjarrit të Paqësorit” – një zonë me aktivitet të lartë sizmik dhe vullkanik – e bën atë veçanërisht të ndjeshme ndaj fenomeneve natyrore ekstreme.

Shpërthimi i Krasheninnikov përbën një rast të jashtëzakonshëm për komunitetin shkencor, ndërsa për banorët dhe autoritetet lokale, është një kujtesë se forcat e natyrës mbeten gjithmonë të paparashikueshme.

“KORÇA BOOM”