Shërbimet elektronike me tarifë për qytetarët dhe bizneset: Ja sa do të kushtojnë

Disa prej shërbimeve që ofrohen në portalin qeveritar “e-Albania” do të jenë tashmë me pagesë. Vendimi është marrë në mbledhjen e fundit të Këshillit të Ministrave dhe do të hyjë në fuqi pas botimit në Fletoren Zyrtare

Sipas vendimit, shërbimet për të cilat do të aplikohet tarifim përfshijnë nënshkrimin elektronik, vulën elektronike, certifikatat për projektin e fiskalizimit dhe transaksionet në platformën qeveritare të ndërveprimit (GG). Pagesat do të realizohen online, në momentin e aplikimit për shërbimin përkatës, përmes portalit “e-Albania”.

Dokumentet me pagesë do të prekin në radhë të parë bizneset, por edhe qytetarët shqiptarë dhe të huaj që kërkojnë nënshkrim elektronik, për të cilin është vendosur një tarifë prej 2 mijë lekësh në vit.

Ndër shërbimet që do të tarifohen për subjektet private janë:

• 4 800 lekë për nënshkrim elektronik (1 vit)

• 20 lekë për dokument me vulë elektronike ose transaksion

• 4 000 lekë për certifikatë elektronike për fiskalizim (1 vit)

• 15 lekë për çdo transaksion në platformën ndërvepruese (GG)

Administrata publike do të përfitojë këto shërbime me tarifë zero, përjashtuar institucionet me vetëfinancim, të cilat do të paguajnë të njëjtin çmim si bizneset për nënshkrimin elektronik.

Pagesat për shërbimet që kryhen një herë (si nënshkrimi ose certifikata) do të bëhen në momentin e aplikimit. Ndërsa për shërbimet që kryhen vazhdimisht, si vula elektronike dhe transaksionet GG, pagesat do të llogariten në fund të çdo muaji, në varësi të numrit të përdorimeve.

Sipas qeverisë, të gjitha të ardhurat që do të gjenerohen nga këto tarifa do të derdhen 100 për qind në buxhetin e shtetit, në përputhje me rregullat për administrimin e të ardhurave nga institucionet buxhetore.

Me këtë vendim, shfuqizohet vendimi i mëparshëm i Këshillit të Ministrave nr.35, datë 22 janar 2020, që përcaktonte tarifat për shërbimet e Agjencisë Kombëtare të Shoqërisë së Informacionit (AKSHI).

Për zbatimin e këtij vendimi është ngarkuar AKSHI dhe hyrja në fuqi do të bëhet pas publikimit zyrtar.

“KORÇA BOOM”