Skënderbeu triumfon në një sfidë spektakolare ndaj Lushnjës, fitore dramatike 4-3 në Korçë

SKËNDERBEU 4-3 LUSHNJA

Shënues: 14′ Estrela, 40′ Tayo, 65′ Çuçka, 90’+9′ Nasr/ 2′ Kamisoko, 16′ Kaçanolli, 45’+2′ (P) Ribaudo

Skënderbeu ka marrë një fitore të rëndësishme dhe emocionuese ndaj Lushnjës, duke triumfuar me shifrat 4-3 në ndeshjen e javës së 13-të të Kategorisë së Parë, një duel që dhuroi gola, përmbysje dhe tension deri në sekondat e fundit.

Ndeshja nisi vrullshëm, me Lushnjën që befasoi korçarët vetëm në minutën e 2-të, kur Kamisoko shënoi golin e parë të takimit. Reagimi i bardhekuqve erdhi shpejt me Estrelën në minutën e 14-t, duke barazuar rezultatin. Por verdhejeshilët nuk u tërhoqën dhe rikthyen epërsinë me golin e Kaçanollit në minutën e 16-të.

Skënderbeu vazhdoi të kërkonte barazimin dhe e gjeti atë në minutën e 40-të me Tayo. Megjithatë, pjesa e parë nuk do të mbyllej aty, pasi Lushnja fitoi një penallti në fundin e shtesës, të cilën Ribaudo e shndërroi në gol, duke çuar ekipin e tij në dhomat e zhveshjes me epërsi 3-2.

Në pjesën e dytë, ekipi i trajnerit Ernest Gjoka u shfaq më agresiv dhe arriti të rikthejë balancën për herë të tretë në minutën e 65-të me golin e Çuçkës. Kur dukej se ndeshja do të mbyllej në barazim, në minutën e 90+9, egjiptiani Nasr u shndërrua në hero, duke shënuar golin e katërt dhe të fitores për Skënderbeun.

Me këtë triumf dramatik, korçarët marrin tre pikë shumë të vlefshme, ndërsa Lushnja largohet e zhgënjyer, pavarësisht një performance të mirë dhe tre herë epërsie gjatë ndeshjes.

"KORCA BOOM"