SOT “zbret” në fushë kategoria e parë/ 5 ndeshje ditën e sotme, nesër finalja e titullit në Korçë

Sot dhe nesër do të luhet java e fundit e kampionatit “Kategoria e Parë”, duke përmbyllur një edicion të mbushur me rivalitet, emocione dhe nivel të lartë gare.

Pesë ndeshje do të luhen ditën e sotme në orën 15:00, ndërkohë nesër (të hënën) në orën 17:00 do të zhvillohet sfida përmbyllëse mes Skënderbeut dhe Laçit, ku do të dorëzohet edhe trofeu i kampionit.

Të dyja skuadrat kanë siguruar tashmë ngjitjen në “Abissnet Superiore” për sezonin e ardhshëm dhe përballja direkte mes tyre do të vendosë ekipin kampion të Kategorisë së Parë.

Ndërkohë, gara për mbijetesën mbetet plotësisht e hapur dhe pritet të ofrojë emocione deri në minutat e fundit ditën e sotme. Dy ndeshje me rëndësi të veçantë do të zhvillohen sot në Kukës dhe Fier. Kukësi do të përballet me Besën, ndërsa Apolonia do të presë Burrelin, në sfida ku rezultati është jetik për objektivat e skuadrave.

Apolonia renditet në vendin e parafundit dhe synon pikët maksimale, duke shpresuar edhe në një hap fals të Kukësit për të mbajtur gjallë shanset për qëndrim në kategori. Nga ana tjetër, Kukësi nuk ka hapësirë për gabime, pasi çdo rezultat negativ mund të ndikojë drejtpërdrejt në fatin e skuadrës.

Kjo javë do të përcaktojë gjithashtu edhe skuadrën e dytë që do të luajë në play-out, përveç Luftëtarit. Gjirokastritët do të përballen me Pogradecin në një tjetër ndeshje me peshë.

Në takimet e tjera, Korabi do të luajë ndaj Ilirisë, ndërsa Lushnja, që mban vendin e fundit në renditje, do të përballet me Kastriotin.

Në prag të kësaj jave vendimtare, gjithçka mbetet e hapur, duke garantuar një përfundim sezoni me intensitet të lartë në “Kategorinë e Parë”.

JAVA 33

3 MAJ (SOT)

ORA 15:00 Korabi-Iliria

ORA 15:00 Kukësi-Besa

ORA 15:00 Lushnja-Kastrioti

ORA 15:00 Apolonia-Burreli

ORA 15:00 Luftëtari-Pogradeci

4 MAJ (NESËR)

ORA 17:00 Skënderbeu-Laçi

“KORÇA BOOM”