Turistët ndezin zjarr, ndërhyrja e shpejtë shpëton fshatin

Më 9 korrik 2025, rreth orës 11:29, në fshatin Plovisht të Njësisë Administrative Gorë, Bashkia Maliq, është raportuar një zjarr në një sipërfaqe bujqësore prej 1 hektari. Fatmirësisht, nuk ka pasur humbje jete apo persona të lënduar.

Zjarri u vu nën kontroll brenda pak minutash, falë ndërhyrjes së menjëhershme të strukturave përgjegjëse, dhe u shua plotësisht në orën 11:50. Në operacion morën pjesë dy mjete zjarrfikëse me shtatë efektivë, dhjetë forca të shërbimit pyjor, katër vullnetarë dhe dy mjete bashkiake. Për sigurinë në zonë ndihmuan edhe tre forca të Policisë së Shtetit me dy automjete.

Sipas të dhënave paraprake nga Drejtoria e Pyjeve në Maliq, dyshohet se zjarri është shkaktuar nga pakujdesia e disa turistëve që kanë lënë zjarr të ndezur. Falë reagimit të shpejtë, flakët nuk u përhapën në zonën pyjore përreth.

Autoritetet lokale dhe strukturat e mbrojtjes civile apelojnë për kujdes të shtuar, sidomos në këto ditë me temperatura të larta, për të shmangur incidente të ngjashme që mund të rrezikojnë mjedisin dhe sigurinë publike.

“KORÇA BOOM”