Të lënë në të ftohtë dhe pa bukë, fëmijët gjenden të braktisur në apartament

Një rast i rëndë është zbuluar në zonën e Plazhit në Durrës, ku tre fëmijë të mitur janë gjetur të braktisur në apartamentin e tyre nga nëna, e cila është e divorcuar. Ngjarja ka tronditur banorët e zonës dhe ka ngritur shqetësime serioze për gjendjen e fëmijëve.

Sipas dëshmive të banorëve, fëmijët kishin disa ditë që ndodheshin vetëm në banesë, pa ushqim dhe në kushte të vështira, duke u përballur edhe me të ftohtin. Ata qëndronin të mbuluar me batanije, ndërsa apartamenti ku jetonin ishte në gjendje të rëndë rrëmuje.

Rasti u zbulua pasi banorët e pallatit, të cilët ishin izoluar për tre ditë për shkak të përmbytjeve që kishin rrethuar zonën, dëgjuan të qarat e fëmijëve. Të alarmuar, ata ndërhynë në apartamentin ku ndodheshin të miturit dhe u përballën me një situatë tronditëse.

Sipas tyre, fëmijët ishin të dobësuar dhe të frikësuar, ndërsa kushtet në të cilat jetonin ishin tejet të papërshtatshme. Banorët njoftuan menjëherë autoritetet për rastin, duke kërkuar ndërhyrje urgjente.

Ngjarja ka nxitur reagime të forta dhe pritet që institucionet përgjegjëse të marrin masa për mbrojtjen e fëmijëve dhe për sqarimin e plotë të rrethanave të kësaj braktisjeje.

"KORCA BOOM"